Bengaluru, Nohprah:
U dkhot jong ka Karnataka Legislative Council, jong ka seng BJP u CT Ravi, uba la shah kem ha ka Sngi Palei ha ki pulit jong ka Belagavi, u la kam ba ka don jingma ïa ka jingim jong u, na ka sorkar Congress.
Ïa u Ravi, la kem hadien ba la don ka jingujor ejahar pyrshah ïa u, halor ka jingkynnoh ba u la pyndonkam da ki kyntien pynjah burom ïa ka nongïalam jong ka seng Congress bad ka Myntri sorkar jong ka Karnataka, ka Laxmi Hebbalkar, ha ka ïingdorbar thaw aiñ ha shwa kane ka sngi. Nyngkong eh la rah ïa u sha thanat ha Khanapur bad hadien la pynkynriah noh ïa u sha thanat ha Ram Durga.
Na ka liang jong ka seng BJP ha Karnataka, ka la pynshisha ba ïa u Ravi, la pynshong ha ka kali bad la ïalam ïa u, sha kylleng ka nongbah, haduh hynnin ka step.
Ha ka jingthoh ha ka Social Media jong ka rynsan X, u CT Ravi u la ong ba ki pulit ki thmu eiei sha lyndet pyrshah ïa u.
Ha ka jingpyllait khubor, u la kynnoh ba ki pulit jong ka Karnataka ki la shim por lai kynta ban ai jingïarap kaba ha shwa eh ïa uwei u briew uba la mynsaw na ka khlieh ha ka por ba u don ha kti jong ki pulit.
U la ong ba u la shong ha ka kali pulit bad la pynïaid kylleng kylleng ha kine ki san haduh hynriew kynta.
“Ki thmu ban leh eiei da kaba pynïeng ïa ki kali jong ki ha ka jaka bakynjah bad ki ïakren phone. Ka tnad pulit bad ka sorkar Congress ki kitkhlieh ïa kano-kano ka jingeh kaba nga ïakynduh”, u la ong ha ka jingthoh ba u la phah.
Ha kawei pat ka khubor ba la phah, kaba la pynmih hynnin ka step ha ka por 4.45, u Ravi, u la pynsaphriang ïa ki dur jong katei ka jingmynsaw ha ka khlieh ryngkat bad ka jingthoh, “Ym don mano-mano ba don jingshngaiñ ha Karnataka”.
Ka seng BJP ha Karnataka, ka la pynsaphriang ruh ïa ka durkhih halor ka rynsan X, ryngkat bad katei ka jingthoh, kaba la ong, ba uwei u Myntri barim (u Ravi), u la kynnoh pyrshah ïa u MLA ba mynta, ïa ka seng Congress ha Karnataka, bad ïa ka sorkar jylla, ba ki thmu ban pynïap ïa u.
Ka jingthoh ba la phah da u Ravi ka i kumba ka dei na ka jaka treikam jong ki pulit. “Kim shym la ïathuh ïa nga ïa kaei kaba nga la leh. Kim leh bha ïa nga bad kim tip shano kin ïalam ïa nga hadien. Ka jingim jong nga ka don hapdeng ka jingma bad u DK Shivakumar, Laxmi Hebbalkar bad ki pulit kin kitkhlieh lada jia eiei ïa nga. Baroh ki long kiba artatien bha hangne ha thanat. Ki leh ïa nga kum u nongleh kam sniew; nga dei u dkhot ka Legislative Council bad u Myntri barim ruh”, u la ong ha ka video.
Shwa kane, ki nongkyrshan jong u Hebbalkar ki la rung shapoh Suvarna Vidhana Soudha bad thombor ïa u Ravi.
U Ravi u la shah kem ha ka sngi Palei na ka jaka jong ka Suvarna Vidhana Soudha hapdeng ka jingïakynad kaba jur bha da ki pulit jong ka Belagavi halor ka jingkynnoh ba u la kren pyrshah ïa u Myntri u Hebbalkar.
