Nongpoh, Nohprah 22
Ha kawei ka jingjia kylla kali ha ka step Sngi U Blei, uwei u rangbah u la duh noh la ka jingim katba lai ngut kiwei pat ba kynthup ïa u nongñiah, ki la mynsaw hadien ba ka kali Auto-rickshaw kaba ki shong ka la kylla khongpong ha ka surok bah National Highway 6 ha Umsawnongkharai.
Katkum ka tyllong khubor na ki pulit, la ïathuh ba katei ka jingjia ka la jia ha ka por kumba 8:30 eiei ha ka step Sngi U Blei katba katei ka Auto-rickshaw kaba don ïa u registration number ML10-B-6460 kaba dang kiew sha ki bynta jong ka shnong Quinine bad kaba pynher sted bha kat haduh ba u nongñiah um lah shuh ban teh lakam bad leit ban pynkylla khongpong ïa katei ka kali ha ki bynta khongwain jong ka surok bah.
Na ka jingkylla jong katei ka kali Auto-rickshaw, uwei u rangbah ba la tip kyrteng kum u Bah Stom Siangshai, 37 snem ka rta na ka shnong Pahamrinai, u la khlad noh hajuh. Ïa ka met ka jong u la pynkit noh sha ka jaka buh metïap ha Nongpoh Civil Hospital na ka bynta ban pyndep ïa ka eksamin post-mortem bad kiwei ki jingdonkam katkum ka aiñ. Katba ïa u nongñiah lem bad ar ngut kiwei pat kiba la mynsaw ha kane ka jingjia, la pynkit noh sha Umsning Community Health Center na ka bynta ban pynïoh ïa ka jingsumar.
Halor kane ka jingjia, na ka liang ki bor pulit ka thanat Nongpoh ki la rah noh ïa katei ka kali Auto-rickshaw sha thanat na ka bynta ban pyndep ïa ka jingtohkit bad jingdonkam katkum ki kyndon jong ka aiñ.
