Amlarem, K’Lyngkot 05
Ka Azad AFC-2 bad Nohron SC ki la ïoh jingjop ha ka ’11th Secondary School Invitation Football Knockout Tournament’ ba la pynïaid da ka Dorbar Shnong Pdengshakap ha ka sngi Saitjaiñ ha ka madan Pdengshakap.
Ha ka jingïakhun kaba nyngkong, ka Azad AFC-2 ka la pynliem noh ïa ka Amlanai da 4-0 kol. U Manbhakupar u la ïoh hat-trick hadien ba ïoh thep kol ha ka minit 25, 38 bad 61, katba ïa ka shi kol pat la thep da u Kitbok Pale (56).
Haba phai sha kawei pat ka jingïalehkai, ka Nohron SC ka la pynliem ïa ka West Jaiñtia Police da 3-2 kol. Ïa ki kol jong ka Nohron la thep da u Mon Buam (16), Rishot Dkhar (34) bad Triple Rongi (45). Katba na ka West Jaiñtia Police la thep da u B. Myrthong (54) bad u B. Sayoo (58).
Kane ka lympung kan bteng biang ha ka 8 tarik ha kaba ka Amlanai Young Boys kan ïakhun pyrshah ïa ka Youngstar SC (Nongtalang) ha ka por 12 baje mynsngi, katba ka Khublei Shibun Enterprises pyrshah ïa ka Nangbah Mulang SC ha ka por 2 baje nohphai sngi.
