Bengaluru, Kyllalyngkot:
Iwei khyllung ba dang 8 bnai, kumba la lap, la ong ba i la shah ktah ha u khñiang jingpang HMPV ha Bengaluru bad kane ka dei ka sien kaba nyngkong ba kane ka jingpang ka la sdang ha kane ka nongbah. Kane ka jingpang, ka la wan paw ha Baptist Hospital, kaba don ha ka thaiñ ba shaphang Shatei jong ka nongbah.
Hynrei ka tnad ka koit ka khiah jong ka Karnataka ka la pynshai ba kam shym la ïoh ban khmih bniah ïa ka nongmuna ha ki Lab jong ki.
“Ki kaiphot ki la wan na ka hospital ki riew shimet bad ngim don daw ban artatien ïa ki Test jong kane ka hospital”, la ong ka tyllong khubor kaba la wan na ka tnad ka koit ka khiah.
U khñiang jingpang HMPV, lane Human Metapneumovirus, la ju lap ha ki khynnah kiba hapoh ka rta kaba 11 snem. Kumba 0.7 percent na baroh ki nongmuna jong ka jingpang flu ki dei ki HMPV.
“Ngim pat tip ïa une u jait khñiang jingpang, namar ngim pat don jingtip shaphang uei u jait khñiang jingpang ba la lap ha China,” ong ka tyllong khubor.
U Commissioner ka koit ka khiah, Harsha Gupta u la ong ba kam dei kaba phylla ba ine i khyllung i la ïoh ïa une u khñiang jingpang.
“Ka jinglap ïa u HMPV ha ine i khyllung kam dei kaba pher. Ha ki por ba la dep, ngi la lap ïa ki nongpang kiba don ka jingpang kaba ïadei bad ka HMPV. Kam don ei ei kaba sngew shyrkhei halor kane, kumta kam donkam ïano-ïano ban tieng ne syier. Lada don kino kino ki jait jingpang bathymmai jong u khñiang HMPV, ICMR ka dei ban phah sha ngi ïa ki jingtip ne ki jingbthah ba la pynthymmai. Haduh mynta, ym pat pynmih ïa ki kyndon ban bud kyrpang na ka bynta kane. Ym pat don ka histori jong ka leit ka wan ha kaba ïadei bad ine i khyllung. Kumba ka long mynta, ym don ei ei ban khuslai ha kaba ïadei bad une u khñiang jingpang,” u la ong.
Ha ka 4 tarik, Kyllalyngkot, ka tnat ka koit ka khiah jong ka jylla, ka la pynmih ïa ka jingpynbna bad ki jingkyntu, hadien ba ka China, ka la maham halor ka jingwan jong u khñiang jingpang HMPV ha katei ka ri.
Ha katei ka jingpyllait khubor, ka sorkar ka la ong ba “kam shym la don kano kano ka jingpang HMPV ka ban don ha ka jylla Karnataka”.
Ha ka jingpynbna, ka tnad ka koit ka khiah ka la pynpaw ba hadien ba la bishar bniah ïa ki jingtip halor ki jingpang kiba ktah ïa ki bor ring bad pynhiar mynsiem kiba la don hapoh ka Karnataka, kam shym la don kano kano ka jingkiew kaba jur ha ka jingdon jong ki nongpang ba la pyntip ha u bnai Nohprah jong u snem 2024 haba ïanujor bad u snem ba la dep.
Katkum ka jingong jong ka sorkar kmie, la ong ba ki briew kiba ïoh pang HMPV ki la don ha India ha ki por ba la dep.
Kane ka jingpang ka don ïa ki dak ki shin kiba ïasyrïem ïa ka jingpang flu ha kaba kiba shah ktah, ki don ïa ka jingsynriah, jyrhoh, sat ryngdang bad kiwei pat kiba ïasyrïem ïa ka baïong khlieh.
Shwa ïa kane, ka Myntri ka koit ka khiah ka Kerala, ka Veena George ka la ong ba ka jylla ka buddien bha ïa kane ka jinglong jingman bad ba ka long kaba la khreh ban ïakhun ïa u khñiang jingpang HMPV lada jia ba mih ha kano kano ka por.
