Jowai, K’lyngkot 07
Ïa ka kam pyllait im ïa ki briew kiba dang sahkut shapoh ka krem dewïong beaiñ ha Umrangso jong ka Dima Hasao district ka Assam la pynsangeh shwa ha ka janmiet 7 tarik Kyllalyngkot bad yn bteng ha ka step 8 tarik kaba bud.
Wat hapdeng ka jingpyrshang borbah da ka Tnad NDRF, SDRF, shipai Indian Army, Navy, Assam Rifles bad ka Tnad Fire & Emergency Services hynrei ym pat shym la lapdien satia ïa ki met na katei ka krem ha kaba ki dang don sa kumba 11 ngut ki nongtrei par kiba dang sahkut shapoh naduh ka step sngi Nyngkong ba la lah.
U heh na ka Tnad Assam Disaster Management Authority (ASDMA) u la ong ba ka jingkiew jong ka um hapoh katei ka par dewïong ka la kynjoh haduh jan kumba 100 phut bad kaba la pynthut ïa kane ka kam aijingïarap. La ïohi ruh ïa lai tylli ki met ïap hynrei ym pat shym la lah ban sei namar ki jingïakynduh jingeh.
Ka kynhun na ka tnad shipai duriaw kaba kynthup ïa ki nongngam um na ka Eastern Naval Command ki la wan poi ha ka janmiet Sngi Ba-ar na ka bynta ban aijingïarap.
Lah ban kdew ba napdeng ki 27 ngut ki nongtrei par kiba la sahkut shapoh katei ka krem dewïong 10 ngut na ki, ki la lait im katba hapdeng ka 13 haduh 17 ngut ki dang jah rngai. Kine ki nongtrei par kiba dang sahkut ki kynthup ïa ki nong Assam, West Bengal bad Nepal.
Ki bor pulit ki la kem noh ïa u Punish Nunisa ïa uba la kynnoh ba u dei trai jong katei ka par dewïong ba beaiñ kumjuh ïa uba shipara arkmie bad ka kurim jong u Chief Executive Member (CEM) ka Dima Hasao Autonomous Council, u Debolal Gorlosa.
Halor kane ka jingjia la mudui ruh da ka ejahar hapoh Umrangso PS case no. 02/2025 hapoh ki kyndon jong ka Mines and Minerals (Development and Regulation) Act, 1957.
Ki khubor ki ïathuh ba katei ka par dewïong ka dei kaba la pyntreikam beaiñ ha kaba la kynnoh ba la leh ruh da ka jingtip jong ki bor sorkar ka thaiñ.
Ki kam aijingïarap ki la sdang haduh kynta ba katei ka jingjia ka la dep jia kaba la pynmih ruh ka jingshah kynthoh kaba jur pyrshah ïa ki sienjam ba la pynkhreh da ki bor pyniaid district.
Na ka liang u Myntri Rangbah ka Assam, u Himanta Biswa Sarma ruh u la pynthikna ïa ka jinglong beaiñ jong kane ka par dewïong bad u la pan ruh ïa ka jingïarap na u Myntri ka Sorkar Pdeng uba khmih ïa ka kam dewïong u Kishan Reddy uba la bthah pat ïa ka Coal India HQ ban ai jingkyrshan.
