Shillong, K’lyngkot 08
Ki shipai Border Security Force (BSF) ka Meghalaya Frontier ki la ïoh biang ban kurup ïa ki mar ba la thmu ban khaïi tuh sha Bangladesh. Kine ki mar ba la ïoh kurup ki dei kiba shongdor haduh kumba T.31.27 lak.
La ong ba hadien ka jingïoh ïa ki jingtip ba thikna, ki BSF ki la pynlong ïa ka jingkhynra ha kylleng ki bynta jong ki jaka khappud ka Jylla kynthup ha ka shnong Shella, Mullpara bad Omtham kiba hap hapoh ka East Khasi Hills.
Ha kine ki jingkhynra, ki shipai ki la ïoh ban kurup ïa bun bah ki mar khaïi tuh ba kynthup naduh u rynsun, ka shini, nep, ki jingdih pynkhlaiñ bor met, slasha, soh bad ki masi lem bad kawei ka kali Mahindra Pickup.
Ïa kine ki mar bad ka kali la aiti noh sha ka tnat Custom ban leh ïa kaba donkam.
