Shillong, K’lyngkot 08
Ka Dorbar ki Rangbah Kur ka Bri Hynñiewtrep ka la long ha ka Sngi Ba-ar ban rakhe ïa ka Lyngkhuh San Snem jong ka Synjuk Ki Rangbah Kur: Ka Bri u Hynñiewtrep (SRKBH).
Ki kongsan ha kane ka sngi lyngkhuh snem ki long u Bah Pynïaid Sing Syiem, Kher Rangbah jong ka Dorbar Thawaiñ Dalariti Rilum Khasi (KHADC) bad Syiem ka Hima Khyrim, Pa’iem Dr. Balajied Sing Syiem bad Pa’iem Ainam Sing Syiem jong ka Hima Mylliem, kiwei-kiwei ki Syiem, ki Lyngdoh jong ki Hima, ki Doloi jong ki Elaka, bad ki khlieh synshar shnong ki la ïadon ryngkat ban pynphuh-pynphieng bad sam la ki jingtip shaphang ka thymmei jong ka longkur longkha ha ka Bri Hynñiewtrep.
U kongsan, Bah Pynïaid Sing Syiem u la kren sani halor ka riti tynrai ba dei ban thawaiñ ha ka KHADC na ka bynta ban pynkup bor ïa ki shlem synshar bad shlem dalariti ha ka Jylla bad ban tehlakam na kino-kino ki ‘riew shim kabu kiba khwan myntoi bad rhah ban ïohnong sha lade da kaba kyrsum ha ki kyndon riti tynrai.
Kiwei-kiwei kiba la kren ha kane ka sngi rakhe lyngkhuh snem ki long ka Kong (Dr.) Streamlet Dkhar bad ki arngut ki Syiem Hima, Pa’iem Dr. Balajied Sing Syiem, Syiem Hima Khyrim bad Pa’iem Ainam Sing Syiem jong ka Hima Mylliem. Nalorkata la pyllait paidbah ïa ka kotsahnam rakhe lyngkhuh san snem ba la taithoh da u Bah Raphael Warjri bad la pynkup burom ha ka nam jong u Khlieh Rangbah ba nyngkong duh, u Bah H.S. Shylla da kaba ai takma sahnam ha ka longïing-longsem ba la mihkhmat da i kmie ki khun bad i khun kynthei rangbah.
Ha ka kylla sngi, ka la don ka shlem-mir-nia ba la pynïaid da u Bah Erwin K. Syiem Sutnga bad kren da u Bah Rapionglang Blah halor ka phang, bad Bah R.S. Khardewsaw ba la pule ïa ka jingthoh da ka longkmie Dr. M.P.R. Lyngdoh, bad ka jingkren lyngkot shaphang ka longkur longkha.
Kyntang ïawai, la ïoh ka jingkren ai khublei da u Bah Aristotle Lyngdoh, Saiñpyniar Lumlang ryngkat ki kyntien kynthoh halor ka rakhe lyngkhuh san snem jong ka Synjuk Ki Rangbah Kur: Ka Bri u Hynñiewtrep.
