Ïaid stet ka jingtrei ïa ka jingkieng kaba pynlyngkot haduh 200 km ban ïaid na Meghalaya sha West Bengal

Shillong, K’lyngkot 08

Ka jingpyntrei ïa ka surok four-lane kaba dei ka jingkieng na Dhubri-Phulbari kaba ïaid najrong jong ka Wah Brahmaputra ka la ïaid kumba la thmu. Ïa kane la pyntip da u Myntri ka Sorkar Jylla uba dei u MLA na Phulbari, Abu Taher Mondal.

U Myntri u la ong ba na ka liang ka Meghalaya ka don ka jingkham slem khyndiat ha kaba sdang ban ïa ka Assam, namar ka Assam ka la dep ban pynïeng kumba 34-34 tylli ki rishot haduh mynta.

U la ïathuh ba u la leit sha ka jaka ba trei ïa ka jingkieng ha Meghalaya ha kaba u la ïoh jingtip na ki ophisar ba ki la pyntip ba yn lah ban pyndep ïa ka jingtrei ha ka por ba la buh lada kam don kano-kano ka jingjia.

Haba kdew ba kane ka jingkieng kan wanrah ka jingkylla kaba khraw ïa ka thaiñ Shatei Lam Mihngi, u Mondal u la ong ba u Myntri Rangbah ruh u la shim khia bha ïa kane ka kam naduh kaba sdang.

“Ynda la dep ka jingkieng phin sa ïohi kin don shibun ki kali ban leit sha Guwahati, namar na kane jingkieng kan pynjan ïa ka lynti”, la ong u Mondal.

Haba kylli, u la ïathuh ba ka jingjrong jong ka jingkieng ka long 19.3 km, bad pynpaw ba ka lah ban dei kawei na ki jingkieng ba jrong tam kaba ïaid najrong jong ka wah, namar kan don haduh 199 tylli ki rishot ban kyrshan ïa ka.

U la ong ba lyngba kane ka jingkieng kan pynlyngkot ïa ka lynti na Phulbari sha Dhubri haduh 200 km.

Katkum ka jingïathuh u Mondal ka thong ban pyndep ïa katei ka jingkieng ka long ha u snem 2028.