Shillong, K’lyngkot 08
Ki Regional Committee na Meghalaya bad Assam kiba dei ban pynïaid shakhmat ïa ki kam kiba donkam ban pyndep na ka bynta ka jingpynbeit pud ha ka wat ba-ar ki la ïoh por biang ban phah kaiphod haduh u Lber mynta u snem.
Ki kam kiba dei ban pyndep da ki Regional Committee ki kynthup kum ka jingleit jurip ïa ki jaka ha khappud nalor ka jingsngap ïa ka sur jong ki nongshong shnong kiba kwah ban don sha Meghalaya ne Assam.
Ki Regional Committee na Meghalaya kim pat lah ban pyndep ïa ki kam kiba la bynshet kynthup ka jingïakynduh bad ki Regional Committee na Meghalaya.
Na ka liang u Chief Secretary ka Jylla, Bah DP Wahlang u la ong ba kine ki Regional Committee na baroh ar tylli ki Jylla ki ïoh por haduh u Lber, 2025 ban pyndep ïa ki kam bad ban phah kaiphod sha la ki jong ki Sorkar Jylla.
U Bah Wahlang u la ong ba ka jingai por biang ïa ki Regional Committee ka dei namar ba ka don ka ilekshon sha ki ar tylli ki Autonomous District Council ha kaba ka jingthep vote kan long ha ka 21 tarik Rymphang 2025.
U la ong ba namar ka jingdon ka ilekshon, ki nongmihkhmat kin leit sha ki jingïalap ilekshon bad la kumno-kumno yn kham kylluid ka por haduh u Lber.
Ha Meghalaya, lai tylli ki Regional Committee ki dei kiba long Chairman da u Symbud Myntri Rangbah, Bah Sniawbhalang Dhar, kawei ka dei kaba long Chairman da u Symbud Myntri Rangbah, Bah Prestone Tynsong bad kawei pat ka dei kaba long Chairman da u Myntri Sorkar, Bah Paul Lyngdoh.
Sa hynriew tylli ki jaka kiba dei ban pynbeit pud hapdeng ka Meghalaya bad Assam ha ka wat ba-ar ki kynthup ïa ka Block-I bad Block-II, Khanduli-Psiar, Deshdoomreah, Borduar, Nongwah-Mawtamur bad Langpih.
