Shillong, K’lyngkot 09
U kyrtong shimet ban ïakhun ïa ka ilekshon MDC na Nongthymmai konstitwensi, Bah Esron Marweiñ u la ong ba ha kano-kano ka aiñ ki don ki jingmyntoi bad ki jingduh jingmyntoi, bad ha kaba ïadei bad ka Article 371 ym don ba batai haduh mynta ïa ka jingma lada pyntreikam.
U la ong ba kumba ka long, ka Article 371 ka la treikam hapoh District Council da ka jingdon ka Para 12A, namar ka long kumjuh ka kyndon kaba ai bor ïa ki aiñ jong ka Sorkar ban long halor jong ki aiñ ba la thaw da ki district council.
Lah ban kdew ba ka seng Voice of the People Party (VPP) ka la ïalap ha kane ka ilekshon halor ka nongrim ban dawa pyntreikam ïa ka Article 371, da kaba kam ba ka dei ka aiñ kaba khlaiñ ban ïada ïa ka jinglong tynrai ha ka khyndew ka shyiap, ka kolshor jong ki nongshong shnong ka Jylla.
U Bah Marweiñ u la ong ba katkum ka Article 371 ba la pyntreikam hapoh Nagaland bad Mizoram, ka batai ïa ka jingïada, hynrei haba pule pat ïa kaei kaba la thoh hapoh jong ka Article 371 ka kren shai ba ha ki ADC kam da don bor palat.
“Kaba ma ka dei ka jingong ba dei ka ïing thaw aiñ jong ka Jylla kaba bat pat ïa ka bor, ïa kane ka bynta haduh mynta ym don ba batai. Ha ka jingïohi jong nga kane ka Article 371 ka lah long mynta hi. Lada peit bha ïa ka jingthoh ha trai jong ka Article 371 la thoh ba ha kaba khatduh ka dei ka Sorkar Jylla kaba lah ban rai ym ki district council”, u la ong.
U Bah Marweiñ u la ong ba ki paidbah kim dei ban bishar tang ïa ka jingmyntoi, hynrei ki hap ban peit ruh ïa ka jingduh jingmyntoi na kata ka aiñ.
“Kim dei ban shu hylla ban ong ba ïoh jingmyntoi, ban pynkhlaiñ ïa ki aiñ tynrai. Hooid, ka jingmyntoi ka don ngi hap peit pat keiñ mano ba bat ïa kata ka aiñ mano ba rai lada wanrah ïa kata ka aiñ”, u la ong.
