New Delhi, Kyllalyngkot:
Ki pulit jong ka Delhi, ki la kem ïa uwei u khynnah klas 12, namar ka jingbyrngem buh bad pynbthei bom sha kumba 23 tylli ki skul ha ka nongbah jong ka ri, ha ki khyndiat sngi ba la leit, la ïathuh ka tyllong khubor.
U Deputy Commis-sioner of Police South Delhi, u Ankit Chauhan, u la ïathuh ha kawei na ki lad phah khubor ba une u briew u la phah ïa ki 23 tylli ’email’ byrngem sha ki skul bapher bapher ha Delhi.
“Ha ka jingtohkit, u la kam ba u la phah ïa ki email byrngem kham mynshwa ruh kumjuh”, la ong u Ankit Chauhan.
Ka lad phah khubor, da kaba pynkynmaw ïa ki heh sorkar, ka la ïathuh ba utei u khynnah uba dang poh rta um kwah ban ïaleh ïa ki eksamin ha skul bad u la pyndonkam ïa kane buit ban phah ïa ki khubor pyntieng khnang ban lah ban pynsangeh ïa ki test.
Kumba 10 tylli ki jaka pule ki la ïohpdiang ïa ka jingbyrngem bom ha ka sngi Thohdieng, kaba dei kaba khatduh eh ha ki jingjia kiba kum kine ha Delhi, la ïathuh ka lad pathai khubor.
Ki heh sorkar ki la ïathuh ba ki pulit kin kren ha ka jingïalang bad ki nongthoh khubor ha ka jaka treikam jong ki kham hadien ha ka sngi bad kin ïasam ïa ki jingtip ba bniah, la bynrap.
Kane ka jingjia ka wan hadien katto katne sngi ba ki pulit ka Delhi ki la lap ba ym duna ïa ki lai tylli ki skul kiba la shah ktah ha ki khubor byrngem shah buh ne shah pynbthei bom lyngba ka email, ha kaba kine ki kylla long pynban ki lanot jong ki khynnah na ki skul jong ki hi.
Kawei na ki katto katne tylli ki skul kiba la ïohpdiang ïa ka jingbyrngem shah pynbthei bom ka dei ka Venkateshwar Global School, kaba la ïoh ïa ka email kaba byrngem shisngi hadien ba ka jingbthei bom kaba phylla ka la jia ha Rohini Prashant Vihar PVR Multiplex ha ka 28 tarik u Naiwieng, ong ka khubor.
Ka lad pathai khubor, da kaba kdew ïa uwei u heh pulit, ka la ïathuh ba ïa kane ka email la phah da ki arngut ki shipara kiba pynrung kyrteng ha katei ka skul namar ba ki kwah ban pynkynriah noh ïa ki eksamin.
Ha ka por ba ai jingmut, baroh ar ngut ki khynnah skul ki la pynpaw ba ki la ïoh ïa katei ka jingmut na ki jingjia kiba la dep ban byrngem buh ne pynbthei bom ïa ki skul, la ong u heh pulit.
La shah ïa ki ban leit hadien ba la maham ruh ïa ki kmie ki kpa jong ki. Hadien ba la pyntip ïa katei ka email, ki pulit ki la pynlong ïa ka jingpeit bniah ïa katei ka skul bad ki la pynbna ba katei ka jingbyrngem ka dei kaba shu thok.
Katkum ka jingong jong uwei pat u pulit, sa ar tylli ki skul kiba don ha Rohini bad Paschim Vihar la phah email byrngem da ki khynnah skul jong ki. Ka daw ka long kajuh – ki khynnah skul ki kwah ba dei ban khang noh ïa ki skul.
Ha baroh ar tylli ki mat la shah ïa ki khynnah skul ban leit hadien ba la ai jingsneng bad maham ïa ki kmie ki kpa jong ki.
Ki jingbyrngem buh ne pynbthei bom ki la pynlong ïa palat 100 tylli ki skul ha Delhi ban ïakynduh jingeh ha ki 11 sngi jong u bnai ba la lah, la ong ka tyllong khubor.
Ki pulit ki la lap ba iïa kitei ki email la phah lyngba ka VPN (Virtual Private Network), kaba pynlong ïa ki ban shem jingeh ban wad ïa ki nong-leh kam sniew.
Naduh u bnai Jymmang jong u snem ba la lah, ki la don palat 50 tylli ki email byrngem buh bad pynbthei bom ki la thmu ym tang ïa ki skul hynrei ïa ki hospital, ki kad liengsuiñ bad ki kompeni liengsuiñ ha Delhi.
Ki pulit kim pat lah ban lap ïa kino kino ki dak ki shin halor kine ki kam sniew.
