Los Angeles, K’lyngkot:
Katkum ki khubor, la ong ba ki paidbah nongshong shnong jong ka nongbah California ha ka Sngi Thohdieng ki la dawa ia ki bor pyniaid ba ki dei ban ai jingpynshai halor ka daw jong ka jingpluh ha Los Angeles bad ki bor pyniaid ki la dep pynjari lypa da ka jingpakhang khnang ba kan ym mih kano-kano ka jingkulmar ne huri- hura ne ka jingiakhih paidbah khamtam ha kum kane ka por ba ka Los Angeles ka dang ïakhun ban pynlip noh ia katei ka ding.
Namarkata ruh la ong ba ki paidbah nongshong shnong bad kiwei de ki nongialam kiba pyrshah sorkar, ki la pynpaw ka jingsngewbitar halor ka jingbym lah ban tehlakam jong ki bor pyniaid ia katei ka jingjia, kaba long kawei na ki jingjia pluh ding ba shyrkhei tam ha US.
Kumjuh ruh u Lat Gavin Newsom ha ka Sngi Thohdieng u la phah ban ai jingpynshai halor ka jinglong – jingman ha katei ka nongbah, da kaba pyni ruh ba ka jingeh ba katei ka nongbah ka iakynduh ka dei namar ka jingbym biang um lane ki lad ban pynpoi um sha katei ka nongbah.
Kumta utei u Lat ruh u la ong ba ka long kaba donkam ban ioh ia ka jingpynshai halor katei kaba la jia baroh ba naei ka sdang bad ha kano ka rukom ka leit jia ruh.
