New Delhi, K’lyngkot:
Katkum ki kaiphod ba la ioh lum da ka tnat ka koit ka khiah, la ong ba kane ka khlam HMPV ba thymmai kaba iasyriem bad ka khlam Covid-19, ka la sdang jur bha ha China bad kaba la wanrah ruh ia ka jingsngewkhia na kiba bun ki heh bad ki tnat ka koit- ka khiah jong ka pyrthei.
Namar la ong ba kane ka jingpang HMPV kaba ieng na bynta ka ‘Human Metapneumovirus’, ka dei ka jait jingshitom kaba ktah ia ka jingring bad jingpynhiar mynsiem.
Kane ka jingpang ka pur ruh na uwei sha uwei pat u briew haba ki iakynduh kam markhmat bad khamtam eh haba ki ia khublei kti ne ia pyndei para-briew.
Ki dak jingshitom kiba lah ban ithuh na kaba paw shabar ki kynthup ia ka jyrhoh, shit met bad kumjuh ruh ka jingset khmut. Ka long ruh kaba iasyriem bad ki jingpang jong ka baiongkhlieh- suhkhriat bad ka ‘Flu’.
Kumta, la ong ba kiba kham lah ban shah ktah bha ha kane ka jait khlam ruh ki dei hi ki khynnah rit, kiba la kham noh ka rta bad kumjuh ruh kito kiba tlot ka bor met lane kiba la don lypa ia kiwei pat ki jingshitom ha ka met.
Ha kajuh ruh ka por la maham ia ki paidbah ba ki dei ban ïada ialade da kaba deng ia ki mask ban kah ia u khmut bad shyntur kumba ju leh ha ki por jong ka khlam Covid hi bad khamtam haba ki jyrhoh lane don ia kitei ki jait jingshitom, ki dei ban da sait khuid bha ia ki kti khnang ba kan lait ban pur sha kiwei pat.
Namarkata, la bthah ruh ia kito kiba la don ia kitei ki jait jingshitom ba kin shongthait shipor na ki kam ba ki ju trei, kin pyntip sha ki nongsumar bad kin ialeh katba lah ban ym pynsaphriang ia ka jingshitom sha kiwei pat kiba iadon lang bad ki ha iing- ha sem.
Ia ka khlam Covid-19, la bna pyrthei hadien ba ka l pur stet na uwei sha uwei pat u briew ha u snem 2019.
Hynrei, kane ka jingpang khlam HMPV pat ka dei kaba la ju don naduh ki phew snem ba la leit bad baroh ki ri ki la ju bna ia kane bad ki tip ruh kumno ban ïada na kane ka jait jingshitom.
