Hyderabad, Kyllalyngkot:
Lah ban kdew hangne ba u KT Rama Rao lane u KTR, nongïalam ka Bharat Rashtra Samithi (BRS) bad 6 ngut kiwei pat ki nongïalam ba ha khlieh duh jong ka seng, kiba kynthup ïa u Harish Rao bad u RS Praveen Kumar, ki la shah set hapoh ïing, ong ka tnad pathai khubor ANI, ha ka sngi thohdieng, da kaba pynshong nongrim ïa ki tyllong khubor jong ka seng.
U nongïalam jong ka seng Bharat Rashtra Samithi (BRS) u KT Rama Rao ne u KTR lem bad ki hynriew ngut ki heh nongïalam jong ka seng, kynthup ïa u Harish Rao bad u RS Praveen Kumar, ki la shah set ha ki ïingsah la jong, la ïathuh ka tyllong khubor ha ka sngi Ba-ar, kumba la ïohlum na ka tyllong khubor.
Kumba la ïathuh, la ong ba ka jingtreikam jong ki pulit ha ka ban pynjur ïa ka jingpahara ka la long ha phyllaw jong ka ïingsah jong u KTR ha ka sngi Ba-ar hadien ka jingshahkem jong u MLA ka seng u Padi Koushik Reddy ha ka Lah Sngi U Blei.
U KTR, uba la shah tohkit ha ka kynhun Anti-Curruption Bureau (ACB) halor ka jingbym beit ha ka liang ka pisa tyngka halor ka jingpynlong ïa ka jingïakop pynher kali Formula E, u la kyntait ïa ki jingkynnoh ba ki long “ki bym don jingmut” bad “ka jingpyndonkam bakla ïa ka rukom treikam ka aiñ”.
U KTR, Myntri barim bad u khun jong u Myntri Rangbah barim jong ka Telangana,u Chandrashekar Rao, u la pynshisha da kaba ong ba ki heh sorkar ki la tohkit ïa u haduh hynñiew kynta da kijuh ki jingkylli watla kim shym la don satia ki sakhi kiba skhem ban pynshisha ïa ka jingkynnoh jong ki pyrshah ïa u.
“Ki (ACB) kim don mukotduma. Ka dei tang ka jingkynnoh ba khlem jingmut. Nga la ong ïa ki ba ka dei ka jingpyndonkam bakla ïa ka rukom treikam jong ka aiñ. Nga la ong ruh ïa ki ba haba ym don mukotduma lah ban shna ïa ka. Ki la ïai kylli ïa kajuh ka jingkylli man ka por haduh jan 80 sien. Hynrei ha ka jingtreikam jong ki, kam shym la don kano-kano ka mukotduma,” u la ong ha ki nongthoh khubor.
U KTR u la pynshong nongrim ruh ïa kane ka kam ba ka seng jong u ka ïakhun pyrshah ïa ka sorkar Congress ha ka jylla ba la ïalam da u Myntri Rangbah u Revanth Reddy. U la kynnoh ruh ïa u Myntri Rangbah ka jylla ba u la “sngewbha da shisha” ban thmu leh pyrshah ïa u shimet.
“Nga la kylli ïa ki (ACB) shano ka bamsap ha kane ka kam. Nga la leh ïa kaei kaei kaba nga la leh kum u Myntri, ha ka jingsngewthuh kaba pura, ban pynthikna ba ïa ka Hyderabad bad Telangana la buh ha ka pyrthei. Lada phi thmu ban kynnoh ïa nga bad ban kynnoh bymhok na kane, ka lah ban dei tang ka jingsngewbha jong u Myntri Rangbah bad ym don palat ïa kata”, la ong u KTR.
U nongïalam ka BRS u la kynnoh ruh ba la pynbor ban buh ïa kane ka mukotduma kum shi bynta jong ka jingpyrshang jong ka sorkar jylla ban pynduhjait ïa ka jingïapher jingmut ha ka saiñ pyrthei. “Kane ka long ha ka nongrim ban pynduh ïa kano-kano ka sur kaba leit ban kylli jingkylli ïa kane ka sorkar. Kumta, ngan ïaleh da ka aiñ, ngan wad ïa ki lad ki lynti katkum ka aiñ baroh bad kyrmen ba ka jingshisha kan wan bad ka hok kan jop”, la ong u KTR.
Ka ïingbishar bahakhliehduh jong ka Telangana, ha ka sngi Ba-ar, ka la weng noh ïa ka jingujor ban pyndam noh da ka KTR, ha ka mukotduma Formula E Rade. Ka kynhun Enforcement Directorate (ED) ka la thep ruh ïa ka Enforcement Case Information Report (ECIR) hadien ba ka ACB ka la buh jingujor da ka ejahar pyrshah ïa u KTR bad kiwei ha kane ka mukotduma.
