New Delhi, Kyllalyngkot:
Ka seng Congress, ka la pynbna ïa ki ar tylli ki jingkular bathymmai, kata ka bor ding ba lait siew, bad ki tyndong LPG ba la ai Subsidy, na ka bynta ban shet jingshet bad ka jingai khaw ei, kaba ka la kular ban pyndep lada ka thaw ïa ka sorkar ha Delhi.
Kine ki long nalor ka jingïarap pisa ba man u bnai na ka bynta ki kynthei, ka bai sumar na ka bynta ki nongshong shnong bad ka jingsiew na ka bynta ki samla bym don kam don jam kiba la pynbna mynshwa, la ong ki heh ka seng.
Haba pynbna ïa ki jingkular ha ophis jong ka Delhi Congress ha ka jingïalang bad ki nongthoh khubor, u Myntri Rangbah ka Telangana u A Revanth Reddy u la ong ba ïa ki jingkular yn pynurlong ha ka jingïalang ka kynhun Myntri kaba nyngkong hadien ba ka Congress kan wan ha ka bor.
Da kaba ai nuksa ïa ka Telangana, ha kaba u la kam ba ka Congress ka la pyndep ïa baroh ki jingkular hapoh 13 bnai naduh ba ka la wan ha ka bor synshar, u Reddy u la ong,
“Ki briew ka Delhi ki la ïohi ïa u Arvind Kejriwal kum u Myntri Rangbah la lai sien bad ïa u Narendra Modi kum u Myntri Rangbahduh la lai sien. Baroh ar ka sorkar Delhi bad ka sorkar kmie kim shym la lah ban pyndep ïa ki jingkular jong ki ban tehlakam ïa ka jingkiew dor, ban ai kam ai jam bad ban pynbiang ïa ki jingtei kiba kham bha. Ki briew mynta ki duh ïa ki lai samoi jong ka Congress ha ka por ba ka Sheila Dikshit ka dang long kum ka Myntri Rangbah. Ka la wanrah ïa ka Delhi Metro kaba don ïa ka jingshakri kaba jur tam ha ka ri. Baroh ki kam pynroi ha Delhi la leh da ka Congress.”
Haba pynshai halor ki jingkular, ki dkhot ka seng ki la ong ba ka Congress kan ai 300 tylli ki Unit bording khlem jingsiew, ki Cylinder LPG ha ka dor T.500 kawei sha ki nongpyndonkam hapoh ïing ha ryngkat ki mar rashon, T. 2,500 ka bai bam sha ki kynthei hapoh ka “Pyari Didi Yojna”, T. 25 lak ka jingsumar pang na ka bynta u snem 2020 na ka bynta uwei pa uwei u nongshong shnong bad T. 8,500 shibnai ka bai bylla sha baroh ki samla kiba la nang la stad, ki bym don kam don jam.
Kane ka jingai jingkyrshan kan ïarap shibun ïa ki nonbshong shnong.
U Reddy u la ïathuh ba ïa ki jingkular la pynkut noh ha ka por jong ka Bharat Jodo Yatra jong u Rahul Gandhi bad ka Delhi Nyay Yatra jong u Devender Yadav.
U President jong ka Delhi Congress, u Devender Yadav, u la ong ba ka don “ka jingleh thok” ha ka skhim bording khlem jingsiew jong u Kejriwal kaba 200 unit, da kaba kynnoh ba u Kejriwal u la kyntait ban peit bniah ïa ki jingkheiñ jingdiah jong ki kompeni sam bording.
U la ong ba ïa ka jingpynbiang bording khlem jingsiew jong ka Congress kaba 300 unit yn pyntreikam da kaba shai lyngba ka jingpynkylla lyngba ki Direct Bank Transfers (DBTs).
U la ong ba ka kit khaw khlem jingsiew kaba la kular da ka Congress kan kynthup ïa u khaw san kilo, 2kg ka shini, 6kg ki jingbam shyieng, 250g ki sla sha bad shi litar ka umphniang bam.
U Reddy u la ther tyngeh ruh ïa ka Bharat Rashtra Samithi (BRS) kaba mynshwa ka dei ka Telangana Rashtra Samithi kaba la synshar ïa ka sorkar Telangana la shi snem naduh ba la thaw ïa ka ha u snem 2014, halor ka mukotduma jong ka Excise Policy.
“Ka Congress, ka la bret ïa ka paralok kaba rit ba la ïatreilang ha ka kam thok halor ka kyiad na ka bor ha Telangana bad mynta, ka la dei ka pali jong ki paidbah ka Delhi, ba kin beh noh ïa u paralok ba heh ha ka kam thok halor ka kyiad, u Kejriwal, na ka bor synshar ha Delhi”, la ong u Reddy.
U la shim khia ruh ïa ka jingpyntreikam ïa ka Stage 4 jong ka Graded Response Action Plan (Grap) ban ïakhun pyrshah ïa ka jingjaboh ka lyer kaba la pyntreikam ha ka sngi Balang ba la lah, da kaba kynnoh ba ki nongwan jngohkai na Telangana sha Delhi ki kem pang ha ka por ba ki leit jngoh Kai bad ki donkam ïa ka jingsumar.
“Ka don ka jingjaboh jong ka saiñ pyrthei, ka jingjaboh jong ka mariang bad ka jingjaboh jong ki jinglamler ha Delhi; ka por ka la dei ba ki paidbah kin leh ïa ka jingkylla kaba kut da kaba jied ïa ka Congress ban synshar,” ong u Reddy.
Ka BRS bad ka AAP ki la pynneh beit ïa ka jinglong shida jong ki halor ka jingkynnoh ba ki leh thok ne klop na ka jingpyntreikam halor ka kyiad.
