Shillong, K’lyngkot 20
U President ka United Democratic Party (UDP) Bah Metbah Lyngdoh ha ka Lah Sngi U Blei, u la kam ba ka seng kan sa pynkyndit ïa baroh ha ka ilekshon MDC ka ban long ha ka 21 tarik Rymphang, 2025 sha KHADC bad JHADC.
Ïa kane u Bah Metbah u la pynpaw haba ai jingkren ha ka Lah Sngi U Blei haba pyllait bad pynbna ïa ka kyrteng jong saw ngut ki kyrtong ban ïa aireng ha ka ilekshon MDC kiba kynthup ïa u Bah Lee Trevor S Bareh na Jirang Konsti-twensi, Bah Synshar Kupar Roy Lyngdoh Thabah na Sohïong Konstitwensi, Bah Anthony Khongwang na Nongshken Konstitwensi bad u Bah Meiowan Pasi na Nangbah Mihmyntdu sha JHADC.
Haba kren sha ki lad pathai khubor hadien ka jingpynbna ïa ka thup kyrteng jong ki kyrtong, u Bah Metbah u la ong, “Ai ba ngan kular ha phi ba ha kane ka kynti ka long kaba phylla ba ngi la ïoh ïa ki kyrtong kiba biang bha bad ngin sa ïoh ïa ka jingïakhun kaba itynnad bad ka ban sa pynkyndit ruh ïa baroh”.
U President ka UDP u la pyntip ba ka seng ka la trei shitom ban pynthikna ba kan ïoh ban thaw ïa ki Executive Committee ba thymmai ha KHADC bad JHADC.
“Ta ka daw ngi la bishar bha ïa ki kyrtong bad wat ka la shimpor khyndiat hynrei ngi la kren shai bha ba ki kyrtong ha kane ka kynti kim dei tang kiba shu pyndap ïa ka kyrteng ban ïakhun ïa ka ilekshon hynrei ki dei ki kyrtong kiba biang suda na baroh ki konstitwensi ba ngi pynïeng”.
Shuh shuh u Bah Metbah u la ong ba ka rai jong ka seng bad ka paralok ha ka Regional Democratic Alliance (RDA) kata ka HSPDP ban nym ïatreilang ha ka ilekshon, kan nym don jingktah satia ïa ka jingleh bha jong ka seng ha ka ilekshon ban wan.
Ha ka jingpynbna kyrtong ha kane ka sngi, la sakhi ba ka jingïakhun ïa ka ilekshon MDC ha Sohïong kan long kaba itynnad bha hadien ba ka UDP ka la pynbna da ka kyrteng jong u Bah Synshar Kupar Roy Lyngdoh, MLA ba mynta uba dei ruh u Bakha trai jong u kyrtong ka Congress u Bah Nathaniel Rymmai.
Haduh mynta, ka UDP ka la pynbna ïa 22 ngut ki kyrtong sha ka ilekshon ha KHADC bad 17 ngut sha ka JHADC.
Katkum ka jingong jong u Bah Metbah, ka thup kyrteng ba khatduh jong ki kyrtong yn sa pyllait ha kine ki shisngi-arsngi ban wan. U la pyntip ruh ba ka seng ka la dep ban pynkhreh ïa ka mat treikam na ka bynta ka ilekshon MDC bad ïa kane yn sa pyllait noh shen.
