Shillong, K’lyngkot 21
U Bah Bindo M Lanong uba dei u Symbud Myntri Rangbah barim ka Jylla bad mynta u MDC ba shu shah thung ha Khasi Hills Autonomous District Council (KHADC), la ïohi ba u la leit ban don bynta ha ka jingïalang ilekshon u kyrtong ka NPP na Nongthymmai uba dei u Chief Executive Member, Bah Pynïaid Sing Syiem ha ka 20 tarik mynta u bnai.
U Bah Bindo u la shah thung kum u MDC khlem da shah jied na ka seng UDP. Katba ka khun bad u pyrsa kurim pat ki mih ban aireng ha kane ka ilekshon MDC ba mynta kum ki kyrtong jong ka Voice of the People Party (VPP).
Kane ka jingmih u Bah Bindo ban leit kyrshan ïa u kyrtong jong ka NPP, ka la pynmih ruh ïa ka jingïakren ha ki paidbah, ba ki kyrtong ka VPP imat kim ïoh ïa ka jingkyrshan wat na la ki bahaïing.
Haba ïakren bad u Bah Bindo, u la ong ba mynta um don shuh ha kano-kano ka seng saiñpyrthei hadien ba ka UDP ka la kyntait ïa u naduh ka jingïalang jong ka General Council mynshem snem, kumta u don ïa ka hok ban kyrshan ïano-ïano katkum ka jingsngew shimet jong u.
U la ong ba ka jingleit ban kyrshan ïa u Bah Pynïaid ha Nongthymmai ka long namar ba u don ka jingïadei kaba jan bad ka ïing ka sem jong u, naduh ki por ba u la long MLA ka Nongthymmai, nalor ba u la ïatrei lang hapoh district council.
Lah ban pynpaw hangne ba ka khun jong u Bah Bindo, Kong Deiti Majaw ka ïakhun ïa ka ilekshon MDC na ka seng VPP na Malki-Laitumkhrah konstitwensi, katba u pyrsa kurim, Bah Rusievan Shangpliang u ïakhun ïa ka ilekshon na ka seng VPP na Mawsynram konstitwensi, bad sa uwei pat u pyrsa kurim, Bah Marbud Dkhar u dei u President jong ka VPP Youth Wing.
Haba kylli, u Bah Bindo M Lanong u la ong ba ka jingleit kyrshan jong u ïa u Bah Pynïaid kam dei hapoh ka konstitwensi ba aireng ka khun ne u pyrsa, bad bynrap ba u khlem kyrshan ïano-ïano ha Malki- Laitumkhrah lane ha Mawsynram.
“Ngan ym kyrshan paidbah hynrei nga kyrshan ïa ki, nga kitbok-kitrwiang ïa ki ba kin ïoh ïa ka jingjop ha kane ka ilekshon. Ka jingkyrshan jong nga ngam lah ban ïathuh ïano-ïano ruh”, la ong u Bah Bindo halor ka jingmih ki bahaïing jong u ha kane ka ilekshon.
