Hapoh 3 sngi dawa jubab ki nongdie madan

"Ngin ap haduh ka lai sngi bad lada kim jubab hapoh ka lai sngi, ngi ruh ngin ïakhun bad ngin nym treh shuh ban long ki dkhot jong ka TVC.

Shillong, K’lyngkot 21

Ka kynhun jong ki nong die jingdie harud surok bad ha ki lynti ïaid kjat ïa kaba la tip kum ka Meghalaya & Greater Shillong Progressive Haw -kers & Street Vendors Association (MGSPHSVA) ha ka Sngi Ba-ar, ka la leit ban buh da ka jingthoh sha u Chairperson ka Provisional Town Vending Committee (PTVC) ban pynpaw ïa ka jingpyrshah bad ka jingbym lah ban pdiang ïa ka jingthmu ban pynkynriah ïa ki nongdie jingdie madan sha ka jaka pynïeng kali ka Meghalaya Urban Development Authority (MUDA).

Ha ka jingïakren bad ki lad pathai khubor, ka Kong Biolin Pyrtuh kaba dei ka President jong ka kynhun ka la ong ba kane ka jingphah shithi jong ka PTVC sha ki nongshong die madan ban pynkynriah noh sha ka jaka pynïeng kali ka MUDA kam dei satia kaba la rai lang da ka Town Vending Committee (TVC) da kaba ong ruh ba ka PVTC ka dei ban ban ai jubab hapoh lai sngi ha kaba ïadei bad kane ka bynta lym kumta, na ka liang jong ki kim treh shuh ban long ki dkhot jong ka TVC.

“Ngin ap haduh ka lai sngi bad lada kim jubab hapoh ka lai sngi, ngi ruh ngin ïakhun bad ngin nym treh shuh ban long ki dkhot jong ka TVC. Kane ka jinglong dkhot jong ngi bad ka jingleh lyndet jong ki ïangi ka pyni shai ba kim burom ïangi bad ka pynpaw shai ruh ïa ka jingbamsap jong ki”, ong ka Kong Pyrtuh.

Ka Kong Pyrtuh ka la ong ba kane ka jingbym treh jong ki nongshong die madan ban kynriah sha ka jaka pynïeng kali ha MUDA ka dei kaba naduh mynshwa bad na ka liang jong ka kynhun, ka la leit ban ïakynduh ïa u Myntri ba dei khmih ïa ki kam pynroi Sor ha ka por ba la shna ïa katei ka jaka ban pynpaw ba kim pdiang satia ïa katei ka jaka ban shong die jingdie. Na ka liang u Myntri u la ong ba un sa peit noh da kawei ka jaka kaba lah ban wanrah ïa ka jinghun na baroh arliang bad ban sa khot pat ïa ka jingïalang ban ïakren. Kaba lyngngoh ka long ba ïa kata ka jingïalang ruh ym pat khot hynrei ka jingthoh ka la wan na ka Sorkar ban phah soi ïa ki nongshong die madan khnang ba yn lah ban pynkynriah noh ïa ki sha ka jaka kaba ka Sorkar ka thmu ban pynkynriah.

Haba kylli halor kaei ka daw kaba la pynlong ïa ki nonshong die madan ban ym lah ban pdiang ban pynkynriah ïa ki sha ka jaka jong ka MUDA, ka Kong Biolin ka la ong ba kane ka jingbym lah ban pdiang jong ki ka dei namar ba ka rukom leh kam long kaba shai bad ong ruh ba kane ka jaka kaba thmu ban pynkynriah ïa ki ka dei kaba don sha trai bha.

“Kaei ka sienjam kaba ka Sorkar ka leh na ka bynta kaba bha, ngin pdiang tangba kane ka rukom leh jong ki ban pynkynriah jaka sha ka jaka pynïeng kali ha MUDA, da lei-lei ruh ngin nym hun namar kane ka jaka ka long sha trai duh”, ong ka Kong Biolin.

Shuh-shuh, ka Kong Biolin ka la kynnoh ruh ba kane ka jingthmu jong ka Sorkar ka dei ban leh tuh bad ban bamsap ïa ka hok jong u baduk da kaba bynrap ruh ba nalor ba ka Jylla ka la long lypa kaba barit, kumta ki kwah ba ka Jylla kan dangrit bad kan dang duk arshah.

“Kim kwah ba ka Jylla kan kiew bad ka Sorkar kam kwah ban ïatreilang bad ngi ka seng hynrei ka leh beit katba ka kwah ban ñion ïa u duk-u suk”, bynrap ka Kong Biolin.

Kumta, na ka liang ki nongshong die madan ki la dawa ba ka PVTC ka dei ban khot mardor ïa ka jingïalang hapoh ka ar sngi bad dawa ruh ba dei ban weng noh ïa ki shithi baroh lym kumta, ka seng kan sa pynlong syndon da ki jingïakhih.