Mawkyrwat, K’lyngkot 21
Ka Federation of Khasi Jaiñtia and Garo People (FKJGP) South West Khasi Hills District ha ka 21 tarik mynta u bnai ka la lap ba ki tiar ki tar kiba donkam ha ka ban ai jingsumar kim pat don ne biang satia ha Civil Hospital Mawkyrwat.
Ïa kane ka seng ka la lap haba leit ban jurip ha ka Sngi Ba-ar hapoh ka jingïalam u President Bah Kenesjune L Nonglait ha ryngkat ki dkhot. Ha kane ka jingjurip ki la leit ruh ban ïakynduh ïa ka Medical Superintendent jong ka Civil Hospital Mawkyrwat ka Dr Manrisha Lyngdoh.
U Bah Kenesjune haba ïakren bad ki lad pathai khubor hadien ka jingjurip, u la ong, ka seng ka lap shibun ki jingduna hapoh katei ka jaka ai jingsumar bad kiba kham kongsan eh ki long ka jingbym pat don ïa ka ICU, ka CT Scan, ka jingbym don ki doktor sniehdoh, doktor khmat kumjuh ki Specialist and General Duty Medical Officer.
Shuh shuh u la ong ruh ba nalor kitei, ka jaka sah (quarter) jong ki nongtrei ruh kim don bad kumba long mynta ki hap ban sah shabar, ka Separate MCH Wing kaba long kaba donkam na ka bynta ki khynnah bad ki longkmie armet ruh kam pat don.
Kumta na ka liang u Bah Kenesjune u la dawa na ki bor ba dei peit ïa ka tnat ka koit ka khiah ba ka dei ban pynbiang noh ïa kitei ki jingdonkam hapoh ka Civil Hospital Mawkyrwat kaba dei ka jaka sumar kaba ai jngshakri ïa baroh ki nongpang jong ka district khnang ba ki nongpang khamtam kiba duk ba suk kim donkam shuh ban leit shaduh Shillong bad kiwei kiwei ki jaka.
