Chennai, Kyllalyngkot:
U khlur ak phlim u Vijay, ha ka jingïalang paidbah kaba nyngkong hadien ba u la sdang ban rung sha ka saiñpyrthei ha u snem ba la lah, u la kynthoh jur ïa ka sorkar DMK ha ka Lah Sngi U Blei bad u la ïakynduh ruh ïa ki nongshong shnong kiba la pyrshah ïa ka kad liengsuiñ jong ka Paradur, Kancheepuram distrik bad ban ai ka jingkyrshan ïa ki.
Hapdeng ka jingsyrtap jong ki kynhun pahara, une u khlur ak phlim u la kren sha ki nongshong shnong, kiba dei nyng-kong eh ki nongrep, ha ka sngi kaba 910 jong ka jingpyrshah jong ki ïa katei ka projek.
U la dawa na ka DMK ban pynkylla ïa ka jaka jong ka kad liengsuiñ kaba la thmu ban shna na Paradur kaba don ha Kancheepuram distrik, kaba dei ka jaka rep bad ka jaka kaba long them.
“Kane ka la kylla long ka jaka kaba biang bha na ka bynta jong nga ban sdang ïa ka jingïaid lynti,” ong u Vijay na ka kali ïalap ilekshon ha ki paidbah nongkyrshan bad ki nongshong shnong jong u. “Ngam pyrshah ïa ka jing-rep, hynrei nga ong tang ba ka kad liengsuiñ kam dei ban wan shane. Ka rai ban tei ïa ka kad liengsuiñ da kaba pynjot 90% ïa ki jaka rep ha kane ka jaka lah ban shim tang da ka sorkar pyrshah paidbah.”
U Vijay u la buh jingkylli balei ba ka DMK ka pyrshah ïa ki projek pynroi kiba heh kum ka surok bah kaba phra lynti ha Salem bad ka projek kad liengsuiñ Kattuppalli katba ki dang don ha ka liang pyrshah hynrei ki pyni ïa ka jingïeng ha baroh arliang katba ki dang bat ïa kajingsynshar. “Phi kyrshan ïa ki nong-rep haba phi don ha ka liang pyrshah bad phi iehnoh ïa ki haba phi don ha ka bor? Ngam sngewthuh ïa kane. Ki briew ki la sngewthuh ïa ka ruh”, la ong u Vijay.
“Nga dawa na ka sorkar ban pynphai biang ïa ki jaka ba la dep ban ïoh na ka bynta kane ka projek kad liengsuiñ. Tei ïa ka kad liengsuiñ jong phi ha ki jaka ki bym ktah ïa ki jaka rep.”
Na ka bynta ka kad liengsuiñ jong ka Paradur, ki nongshong shnong jong ki 13 tylli ki shnong ha Parandur kin hap ban plie lad ban shim jaka kaba heh 4,791.29 akar, ha kaba 2,605 akar ki dei ki jaka shyiap.
Ha ka Sngi U Blei, u Myntri ka tnat pla tyngka u Thangam Thennarasu u la kren halor ka jingdonkam jong ka kad liengsuiñ kaba la thmu ban tei ïa ka Parandur.
“Ai ba un (Vijay) ïakynduh ïa ki nongïakhih, uno uno u lah ban leh. Hynrei, kane ka kad liengsuiñ kam dei tang kaba kongsan na ka bynta ka Tamil Nadu hynrei na ka bynta ka roi ka par jong ka ri,” u la ong.
Ka kad liengsuiñ bathymmai jong ka pyrthei, kaba jngai 70 kilomitar na Chennai yn tei khatduh eh ha u snem 2030 ha ka jinglut kaba T.20,000 klur bad kaba lah ban kit ïa ki nongleit nongwan kiba 10 klur ha ka shisnem.
Katkum ka jingong jong ka sorkar bad ki riew shemphang na ki karkhana bad ki kam liengsuiñ, kane ka kad liengsuiñ kaba ar kan wanrah ïa ka jingbei tyngka kaba kham bun bad ka jingïaid liengsuiñ, kaba lah ban ïarap ha ka roi ka par jong ka Tamil Nadu.
“Kan kyrshan ïa ka jingthmu jong ngi ban wanrah ka ïoh ka kot kaba $ 1 trillion ha u snem 2030 bad da kata ka thaiñ Shatei-lam-Mihngi baroh kawei bad ka ri”, la ong u Myntri.
