Shillong, K’lyngkot 22
Ka lympung ïalehkai Third Division Shillong Cricket League 2024-25 ka la nangjam shaphrang ha kaba ka Turshaphrang CC bad ka Youngstar ki la ïoh jingjop ha ka Sngi Balang.
Ha kane ka jingïakhun kaba la long ha madan Urkaliar, Shillong, ka Turshaphrang ka la pynliem noh ïa ka United Mates da 62 run. Ka United Mates kaba la jop ïa ka kynting pisa, ka la ailad shwa ïa ka Turshaphrang ba kan tied nyngkong ha kaba ka la ïoh 206 run bad shah pynhap 1 wiket ha ki 20 over. Kane ka la wan lyngba ka jingïalehkai bha u Rudolf Syiemïong, uba la ïoh ban khyrwit 95 run na ki 56 bol bad u Raimonlang Mawthoh u la ïoh 86 run na ki 54 bol. Katba u Rupam Das u la shim shi wiket na ka bynta ka United Mates.
Haba wan beh ïa ka thong, ka United Mates ka la ïoh tang 144 run bad shah pynhap 8 wiket ha ki 20 over. U Vishal Deb u la tied 44 run na ki 21 bol bad u Partha Paul u la ïoh 35 run na ki 37 bol. Katba u Erich M Lyngdoh u la shim 2 wiket bad 1 wiket da u Rudolf Syiemïong. Ïa ka nam Player of the Match la ïohpdiang da u Rudolf Syiemïong.
Haba phai sha kawei pat ka jingïakhun kaba ar, ka Youngstar ka la jop da 8 wiket ïa ka Nangkyntiew CC. Ka Nangkyntiew kaba la shimti ban tied nyngkong, ka la ïoh 64 run bad shah pynhap 10 wiket ha ki 18.1 over. U Edmund Sawian u la tied 22 run na ki 24 bol bad u Rinaldo Sawian u la ïoh 19 run na ki 31 bol. Katba u Aditya Paul u la shim 4 wiket bad 2 wiket da u Asik Alam na ka bynta ka Youngstar.
Haba wan wan shimti ïa ka pali kaba ar, ka Youngstar ka la lah ban kynjoh sha ka thong da kaba ïoh 67 run bad shah pynhap 2 wiket ha ki 5.5 over. U Md.Wahid u la tied 28 run na ki 18 bol bad u Asif Ali u la ïoh 26 run na ki 13 bol. Katba u Cassius Dkhar u la shim 2 wiket na ka bynta ka Nangkyntiew. Ïa ka nam Player of the Match la ïohpdiang da u Aditya Paul.
