Shillong, K’lyngkot 22
Ki kyrtong ban ïakhun na Mawlai konstitwensi ha kane ka ilekshon sha ka Ïingdorbar KHADC ki la mynjur lang bad ka Mawlai Town Dorbar ban pynlong ïa ka jingïalap ilekshon da kaba shu leit lang ha kajuh ka rynsan lane ‘common platform’ ym shuh ban pynlong da ka jingïalang paidbah kaba pynlong mar la ka jong khnang ban ym shah pynthut ki samla pule kiba dang don hapdeng ka eksamin.
Ïa kane ka rai la shim ha ka jingïalang ha Mawlai ha ka Sngi Balang kaba la long hapdeng ka Mawlai Town Dorbar kaba kynthup ïa bun tylli ki Dorbar Shnong lem bad baroh ki kyrtong kiba thmu ban ïakhun ïa ka ilekshon MDC na Mawlai konstitwensi.
Haba ïakren bad u Secretary ka Mawlai Town Dorbar, Dr. Marco Mitri, u la ong ba hadien ka jingïatai sani lang bad ki kyrtong kiba dei na ki seng saiñpyrthei bapher-bapher bad ki kyrtong shimet, la mynjur lang ban pynlong noh tang da ka jingïalap ilekshon kaba pynlong lang ha kajuh ka rynsan (common platform) ha man la ki shnong hapoh ka jingpynïaid ki Dorbar Shnong.
U la ong ba la mynjur lang ba tang ki kyrtong kin kren sha ki paidbah ha ka jingïalap ilekshon na ka rynsan kaba la pynbeit da ka Dorbar Shnong khnang ba ki paidbah nongshong shnong jong ka shnong kin ïoh ban sngap khamtam eh ban ym pynthut ïa ki samla pule.
U la ong ruh na ka liang ka Mawlai Town Dorbar bad ki kyrtong, ki sngew dei ba ym dei ban pynlong tamasa ïa kane ka ilekshon bad kam dei ban ktah ïa ki samla pule bad kan ym wanrah ïa ka dheng kali kaba ktah lang ïa baroh.
“Ka bynta kaba kongsan eh ba ngi mynjur lang ban shim ïa kane ka rai ka long ba ngim kwah ban pynthut ïa ki samla kiba dei ban thoh ïa ki eksamin bapher-bapher ha une u bnai ban wan namar lada don ki jingïalang paidbah ka ktah shisha,” la ong u Dr. Marco.
U Dr. Marco u la ong ba ïa ka Common Platform yn pynlong ha man la ki shnong kiba shah kynthup hapoh ka Mawlai Town Dorbar ha kaba la mynjur lang bad baroh ki kyrtong ban ym pynlong shuh ïa ki jingïalang paidbah (public meeting) hynrei ki kyrtong baroh kin leit lang ban ai jingkren ha kajuh ka rynsan kaba la pynbeit ha la ki shnong ki shnong ka ban sa pynïaid da ki nongkitkam shnong.
Shuh shuh u la ïathuh ha kito ki jaka ba pynlong Common Platform, na ka liang ki ‘riew paidbah ki lah ban wan sngap ha kane ka jingïalap ilekshon jong ki kyrtong hynrei kim dei ban rah lama, bad dei tang ki kyrtong kiba lah ban wanrah lama, la ki dei ki kyrtong jong ki seng saiñpyrthei ne ki kyrtong shimet.
Ka jingthep ‘vote’ na ka bynta ka ilekshon sha ka Ïingdorbar Khasi Hills Autonomous District Council (KHADC) bad Ïingdorbar Jaiñtia Hills Autonomous District Council (JHADC) kan long ha ka 21 tarik Rymphang bad ka jingñiew ‘vote’ kan long ha ka 24 tarik Rymphang.
Kumta ruh da ki phew hajar ngut ki samla pule kin sa thoh ïa ka eksamin Matrik lane SSLC bad HSSLC ka ban sa sdang naduh ka taïew ba-ar u Rymphang.
