Na ka 60 km ki jaka ha khappud Bangladesh bym pat ker sainar shiah, kumba 50% dei ha West Jaiñtia

Haba kubur ba ki don ki jingeh ha kaba ïadei bad kane ka kam, u la ong ba ka sorkar ka pyrshang ban leh ïa kaba bha tam.

Shillong, K’lyngkot 22

U Myntri Rangbah ka Jylla, Conrad K Sangma u la ong haduh 60 km eiei ki jaka bym pat dep ker sainar shiah ha khappud bad ka ri Bangladesh. U la ïathuh ruh ba na kane ka 60 km, kumba 50-52% ka dei ha West Jaiñtia Hills.

Kat kum ka jingïathuh u Conrad, ki jaka ha khappud ki bym pat dep ban ker sainar shiah ki long kumba 3.5 km ha East Jaiñtia Hills, 35.9 km ha West Jaiñtia Hills, 7.19 km ha South Garo Hills, 14.15 km ha East Khasi Hills bad kumba 3.5 km ka dei ha South West Khasi Hills.

“Hooid, ha kaba ïadei bad ka jingker sainar shiah, sa kumba 60 km ka dang sahteng, 50-52 % ka dei tang ha West Jaiñtia Hills, lait na kane ka 60 km kiwei ki jaka kumba 375 km eiei la dep ban ker sainar shiah”, u la ong.

U Myntri Rangbah u la ong ka sorkar ka la shim bun ki lad ki lynti ban khanglad ïa ki briew na Bangladesh ban wan rung sha kane ka Jylla, hynrei u la ong ruh ba kam dei ba don da ka jingkhang nar ha khappud ban khang beit sbak.

Haba kubur ba ki don ki jingeh ha kaba ïadei bad kane ka kam, u la ong ba ka sorkar ka pyrshang ban leh ïa kaba bha tam.

“Haba ngi ïoh jingtip ngi shim kam, ngi kwah ban pyndep ïa ka jingker sainar shiah ban pynthikna ba ym don uwei ruh ban ïoh rung beaiñ” u la ong.

“Ym don kiba kwah ban don kiba wan rung beaiñ, tangba kam dei ba ngi don da ka jingkhang nar ha khappud ban khang beit sbak. Haba don kano-kano ka jingujor lane ka jingtip ba don ki briew kiba wan rung beaiñ ngi leh ïa kaba donkam”, u la ong.

Haba kylli halor ka jingmih ha ki lad pathai khubor ba u briew ba pynmynsaw ïa u tyngshop Bollywood ha Mumbai u dei uba ïoh rung lyngba ka Dawki, u Myntri Rangbah u la ong, “Ngam tip ba dei uba rung lyngba ka Dawki, ngam don jingtip eiei ïa kata. Lada nga ïoh ïa ka shithi ujor na ka MHA lane na ka Sorkar Maharashtra nga lah ban wad jingtip bad ban ïathuh eiei”, u la ong.