Shillong, K’lyngkot 22
Ka Meghalaya Athletics Association (MAA) ha ka Sngi Balang ka la pynkup burom ïa u General Secretary, Bah Finely L. Pariat uba la shah thung kum Joint Secretary ka Athletics Federation of India.
Ïa kane ka jingpynkup burom la pynlong ha ka sngi ba ar jong ka 6th Meghalaya Games 2025 ha Wahïajer Complex, ryngkat ka jingïadon lang u Senior Vice President ka synjuk u Bah EMH Passah, kumjuh u MLA ka Jowai Constiteuncy Bah Wailadmiki Shylla bad uba long u Chairman ka Meghalaya Urban Development Authority kum u kongsan lem bad u Working President ka MSOA, Bah John F. Kharshiing bad u Asst. Director ka tnat ïalehkai u Bah Paia B War Nongbri.
Na ka liang ka MAA ka la pynpaw ka jingsngewsarong halor katei ka jingshah jied u nongïalam jong ka hapoh ka synjuk ïalehkai athletics jong ka ri bad ka la khmih lynti ruh kan long ka jingmyntoi na ka bynta ka Jylla hi baroh kawei.
