Nongstoiñ, K’lyngkot 23
Ha ka miet shiteng synñia jong ka 22 tarik mynta u bnai, kawei ka kali tourist na Assam kaba don ïa u registration number AS01-RC-2520 ka la shah pynpait pynpra ha ki runar bym shym la lah satia ban tip ki dei kiei.
Katei ka jingjia ka la jia ha kawei na ki jaka ha ka sor Nongstoiñ hajan ka IB jong ka tnat PWD.
Ka khubor ka ong ba ki paidbah nongshong shnong ka shnong Upper New Nongstoiñ mar ïa ïohsngew ïa ka jingsawa, ki la ïamih ban leit peit hynrei ki khlem ïohi shuh ïa ki briew bad la don sa tang ka kali kaba la shah pynjulor ha ryngkat ki tiar ki tar.
Shuh shuh, la ong ruh ba hadien katto-katne por la wan poi ruh ki pulit ka Nongstoiñ ha ryngkat u nongñiah jong katei ka kali.
Katkum ka jingïathuh u nongñiah jong katei ka kali u la ong, ki ïa don kumba 5 ngut ha ka kali ha kaba 2 ngut ki runar ki la shu wan thombor ïa ki bad hadien kane ki la phet krad noh na katei ka jaka. Nangta, u la ïathuh ruh ba kitei kiwei ki pat ki bar jylla ki dei kiba la kam kum ki nongtrei jong ka Reliance Jio.
Halor katei ka jingjia, na ka liang jong ki pulit ki la rah noh ïa katei ka kali ryngkat u nongñiah sha thanat Nongstoiñ ban pynlong ïa ka jingtohkit halor katei ka jingjia.
