New Delhi, Kyllalyngkot:
Ka Central Bureau of Investigation (CBI) kan mudui ïa ka jingujor hakhmat ka Calcutta High Court (HC), ban dawa ïa ka jingpynshitom ban ïap ha ki kti jong ka aiñ pyrshah ïa u Sanjoy Roy, uba la shah rai “shah set patok shi jingim haduh ban da ïap” da ka Kashari Sealdah halor ka mukotduma leh beijot bad pynïap briew ha Kolkata, la ïathuh ki heh sorkar ha ka Sngi Balang, ar sngi hadien ka jingbishar.
Katkum ka jingïathuh ki lad pathai khubor la ong ba ka CBI ka la ïoh ïa ka jingai jingmut na ka liang ka aiñ ba ïa kane ka mukotduma lah ban kheiñ kum ka “ba duna tam na kiba duna tam”, kaba dei hok ban shah pynshitom da kaba shah pynïap, ki la ong.
Ka kynhun tohkit jong ka sorkar kmie ka lah ban ujor pyrshah ïa ka hukum jong ka ïingbishar jong ka Sealdah kham kloi katba lah ryngkat bad ki jingkynthoh kiba bniah kiba kyrshan ïa ka jingpynshitom ban ïap ha ki kti jong ka aiñ, la ïathuh ka tyllong khubor.
Ka jingkyrpad jong ka kynhun ban pynshitom da kaba phah pynïap ïa u Roy, la kyntait da ka ïingbishar kaba ha shwa, ha kaba u Additional District and Sessions Judge, u Anirban Das, u la ong ba katei ka kam runar, kam shym la hap ha ka kyrdan “rarest of the rare”.
“Ka kynhun CBI ka la kwah na ka bynta ka jingpynshitom ban pynïap ha ki kti jong ka aiñ. U nongïasaid aiñ uba ai jingkyrshan u la kwah ba dei ban ai ïa ka jingpynshitom ban set patok katkum ki kyndon ha ka jaka jong ka jingpynshitom da kaba pynïap. Kane ka kam runar kam hap hapoh ka kyrdan ‘rarest of the rare’,” la ong u nongbishar u Das haba rai pynshitom ïa u Roy.
“Nga rai pynrem ïa phi da kaba set patok shi jingim, kaba mut haduh ka sngi kaba khatduh jong ka jingim jong phi, namar ba phi la pynmynsaw ha ka por ba phi leh beijot ïa ka lanot kaba la pynlong ïa ka ba kan ïap…,” u la ong ïa u Roy.
Ka sorkar West Bengal ka la dep ban leit sha ka HC, ha kaba ka la pynibor pyrshah ïa katei ka rai bad ka la dawa ban pynshitom da kaba pynïap ha ki kti jong ka aiñ ïa u Roy.
Ka kynhun CBI ka la pyrshah ïa ka hok jong ka jylla ban ujor mukotduma ha katei ka mukotduma, da kaba kynnoh ba namar ba ka dei ka kynhun pynngat mukotduma, ka don ka hok ban ujor halor ka nongrim ba kam biang ka jingpynshitom, la ïathuh ka tyllong khubor.
U Deputy Solicitor General u Rajdeep Majumdar, uba la mih ban leit hajir na ka bynta ka kynhun CBI, ha ka sngi Balang, u la pyrshah ïa katei ka jing-ai jong ka jylla, da kaba pynskhem ba ka sorkar West Bengal, kam don hok ban ujor pyrshah ïa ka hukum jong ka ïing bishar ba nyngkong, halor ka nongrim ba kam biang.
U la pynpaw ba ka kynhun tohkit ka la kwah ban ai jingpynshitom ban pynïap ha ki kti jong ka aiñ ïa u Roy hakhmat ka ïingbishar kaba bishar ha shwa.
Ka HC ka la ong ba kan bishar ïa ka kynhun CBI, ka longïing jong ka lanot bad jong uba shah rai pynrem ha shwa ban rai halor ka jingpdiang ïa ka jingujor jong ka sorkar jylla. Ka kashari ka la ong shuh shuh ba kan bishar ïa kane ka kam ha ka 27 tarik, Kyllalyngkot.
Kane kaba shah pynïap ka dei ka doktor kaba dang shah hikai kaba la 31 snem ka rta, ha shwa kane, ka la shah leh be-ijot bad shah pynïap ha ka por mynstep jong ka 9 tarik, Nailar ha ka Seminar Hall jong ka RG Kar Medical College and Hospital ha Kolkata ha ka por ba ka dang shong pynjahthait ha ka por ba ka dang don ha ka kam.
Ka met jong ka kaba don ki dak jingmynsaw kiba jur bha, la lap ïa ka hapoh hall da uwei u doktor ha ka step kaba bud.
U Roy, uba dei u nongtrei mon sngewbha bad ki pulit jong ka Kolkata, u la shah kem ha ka sngi kaba bud katkum ki dur CCTV ha kaba la ïohi ïa u ba u rung shapoh ka Seminar Hall ha ka por 4.03 mynstep ha ka sngi ba jia katei ka jingjia.
Ha ka 13 tarik, Nailar, ka Calcutta HC ka la pynkylla ïa ka jingtohkit ha kaba ïadei bad ka jingjia shah leh be-ijot bad shah pynïap na ki pulit sha ka kynhun CBI. ka mukotduma leh beijot-pyniap briew na ki pulit sha ka CBI. Ka kynhun tohkit ka la shimti ïa kane ka mukotduma ha ka sngi kaba bud.
