U Nongsaiñ Hima, 1979
Ha Meghalaya ym lah ban len ba ka jingkiew dor ka petrol ka ktah eh ïa ka ioh ka kot, ia ka dor jong ki tiar bam tiar dih bad ka leit ka wan. Kane ka jylla kaba dang shu lah seng bad kaba la sdang ban pynïar ïa ki surok sha kylleng ka ri ka hap ban shañiah tylli ha ki kali bad ïa ki mar ki maata bad ïa ka leit ka wan, Ka jingkiew dor ka petrol ka pynmih shibun ki jingeh ïa ki briew jong kane ka jylla kiba hap ban shaniah tylli ha ki kali ba la pynïaid da ka petrol bad diesel.
Ka Meghalaya ka dei ka jaka ri lum. Ka don ki wah kiba tuid na lum sha thor lyngba ki riat ki ram. Kumta ym lah ban pyndonkam da ki jhaj ne liengrit ha kaba kit mar ne ha ka leit ka wan.
Sha dkhar ki suk ban pyndonkam da ki jhaj, lieng heh bad liengrit namar ki wah ki tuid jai jai tang ha ki madan bad pyntha. Ka dor bai kit ruh da ki jhaj bad ki liengrit ne lieng heh ka long kaba tad. Nalorkata ruh don ki rel kiba ka bai kit mar bad kit briew ka long kaba tad. Don ruh ki liengsuiñ kiba kit mar bad kumta ter ter.
Haba la pyrshang ka Meghalaya bad ka ri dkhar ha kane ki lieng te ka long kumba ïa pyrshang ka miet bad ka sngi. Kumta ha Meghalaya, da ki jingpynkiew dor ïa ka umphñiang petrol bad diesel ka kyntiew lut ïa ki dor ki mar bam mardih bad kane ka ktah ïa ka ioh ka kot ki briew bad ka jylla bad ruh kan don ka jingkyrduh bad jinghiran kaba khraw. Ki mar ki mata kumba ka long mynta ki la da kiew dor lypa.
Shikyntien ruh lah ban kdew ba ka dor ka petrol shi gallon kata san litre, ka la kiew kynsan na ka 16 tyngka sha ka 17 tyngka bad mynta pat hadien ka mang pisa ka sorkar India ka petrol ka la kiew sha ka 19.45. Na kane lah ban sngewthuh ruh shisyndon kumno kane ka Jylla ka hap shop ha ki apot kiba sniew bha.
Ka jingdonkam ïa ka petrol da ka pyrthei baroh kawei ka la long da shisha ka sakhi kaba ki por mynta ki ïathuh. Khlem ka petrol ka jinglait ka pyrthei shaphrang kan suki bad ka lah ruh ban long ba kan pynlom noh. Bun ki ri ka pyrthei ki sei na ka mei ram- ew ïa ka umphniang rew bad ïa kane ka umphñiang rew la pynkhuid ïaka. Na kane ka jingpynkhuid mih ki jaid umphñiang kiba pher bapher. Kaba ha jrongtam bad kaba rem dor eh na ki umphñiang ba la pynkhuid ka long ka umphñiang ban pynher ïa ki liengsuiñ. Kaba ar pat dei ka petrol bad sa bud ter ter sa ka umphñiang sharak, diesel, ka mobil, ka grease bad kumta ter ter.
Ka jingpynmih ïa ka umphñiang kaba jur tam dei ha ki ri Middle East. La ong ba ka jingbun bad ka jingsei ïa ka umphñiang rew bad ka jingpynkhuid ïa ka petrol da ki ri Middle East ka long palat ïa ka jingpyrkhat briew namar ka long kumba shu tuid ka wah. Ka long namarkata kaba donkam ba ïa ka dor ka petrol ha Meghalaya, la dei ban kham pyrkhat ba kan duna.
