Shillong, Rymphang 03
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem u la ong ba ka Voice of the People Party (VPP) kan rem kput bha ha kane ka ilekshon MDC, khamtam ha ki konstitwensi jong saw ngut ki MLA ka VPP.
Katkum ka jingong jong une kyrtong ka NPP na Nongthymmai, ka VPP kan shah rem ha ki konstitwensi ba ka don ki MLA, namar ki paidbah ki la dep mad bad sngewthuh ïa ki jingbakla.
“Nga sngew ka jubab na ka liang ki paidbah kan sa don, kin peit hi ïa kita ki briew kiba lah ban trei. Phin sa ïohi khamtam eh ha ki konstitwensi jong saw ngut ki MLA ka VPP, baroh kin rem lut namar ki paidbah ki la dep mad”, u la ong.
U la ong ba ha ka por ba ki paidbah kim pat mad, ki tyrwa ïa ka bneng ka khyndew sngew kumba la ïoh lut.
U Bah Pynïaid uba dei mynta u MDC na Sohryngkham un ïakhun noh ïa ka ilekshon na Nongthymmai na ka NPP, ha kaba u la leit ban thep kyrteng ha ka Lah Sngi U Blei hapdeng ka jingsynran lang ki nongïalam jong ka Confederation of the North East Council ba mihkhmat ïa ki 10 tylli Autonomous District Council (ADC) hapoh ka thaiñ Shatei Lam Mihngi, kynthup ïa u Chief Executive Member (CEM) ka Bodoland Territorial Council, ka Karbi Anglong Autonomous District Council (KAAC) bad ka Tripura Territorial Council (TTC) nalor ki nongkitkam bad ki nongkyrshan ka NPP.
Katkum ka jingong u CEM, ka jingpynbiej hapoh ki rynsan social media ka jur shaba palat haduh ba ki paidbah ki la shah ïalam bakla ha ka ilekshon ba dang shu dep.
“Lada phi peit tang ha ki social media kiba bun ki briew ki la shah ïalam bakla, hynrei sngewtynnat pat ba ki briew ki la shah hikai bad ki la stad mynta, namar ki la dep mad”, la ong u CEM ka KHADC.
Halor ka jingdawa ka VPP ïa ka Article 371, u Nongïalam ka NPP u la ong ba lada ki paidbah ha Eastern Nagaland kaba la treikam ka Article 371, ki dang wan shane namar ba ki kwah ïa ka Khyrnit ba Hynriew, ki paidbah ki la dei ban bishar hi kaei kaba kham kongsan bad kham khlaiñ ban ïada ha ki jaka jong ki riewlum.
Na ka liang u CEM ka KHADC u la kyntu ïa ki paidbah ban jied ïa ki kyrtong kiba lah shisha ban treikam da kaba buh ha ka jingmut jingpyrkhat ba ka kam jong u MDC ka dei kaba eh bha, khamtam haba phai sha ka jingtyrwa ban pynkylla ïa ka Khyrnit ba Hynriew.
“Nga kyrpad ïa ki paidbah ba ki dei ban kyrshan ïa ki kyrtong kiba lah ban treikam ban ïada ïa ki riewlum trai ri trai muluk”, u la ong.
U Bah Pynïaid ïa mynta u dang dei u MDC ka Sohryngkham konstitwensi, hynrei u la ong ba ka rai ban leit ïakhun na Nongthymmai ka dei hadien ka jingkhlad noh kynsan jong u MDC, Bah Latiplang Kharkongor.
“Kiba bun ki briew ki la wan bad kyrpad ïa nga ban ïakhun noh na Nongthymmai. Ha kaba nyngkong nga la kyntait namar nga la shakri ïa ka Sohryngkham la bun snem. Hynrei, shwa ba ngan shim ïa ka rai, nga la ïakynduh ïa ki nongïalam bad ruh ïa ki bahaïing bahasem u Bah Latiplang bad ki la ai ka kyrkhu kyrdoh ïa nga bad ai shibun ki jingkyrmen ba ngan wan ïakhun noh na Nongthymmai”, la jubab u Bah Pynïaid.
