New Delhi, Rymphang:
Shi sngi hadien ba ki la mih noh na ka AAP, ki phra ngut ki MLA jong ka seng ha Delhi, ki la leit ban pynïasoh bad ka BJP, ha kaba la ong ba kane ka la long ka jingduhnong kaba khraw na ka bynta ka seng bad kumjuh ïa ka kynhun hapoh ka jingïalam jong u Arvind Kejriwal.
Shuh shuh kine ki MLA ki la ong ba kim don jingshaniah shuh ïa kane ka seng hapoh ka jingïalam jong u Kejriwal. Kine MLA ki la long napdeng 18 ngut ïa kiba la duh tiket ban ïakhun ha ka ilekshon ka ban wan.
Kine phra ngut ki MLA ki kynthup ïa u Girish Soni (Madipur), Pawan Kumar Sharma (Adarsh Nagar), Bhawna Gaur (Palam), B S Joon (Bijwasan), Madan Lal (Kasturba Nagar), Rajesh Rishi (Janakpuri), Rohit Kumar (Trilokpuri), Naresh Yadav (Mehrauli). Kine ki la phah ruh ïa ka shithi iehnohkam sha u Lamphang jong ka Delhi Assembly u Ram Niwas Goel.
Kane ka jingmih jong kine ki MLA ka la long ka jingktah kaba jur ïa ka seng AAP, khamtam hashwa ban pynlong ïa ka ilekshon.
Kumba la ïathuh ka tyllong khubor la ong ba kine ki MLA ki la dap da ka jingsngewsih hadien ba kim ïoh tiket ban ïakhun ha ka ilekshon ha ka 5 tarik, Rymphang bad ki la phai khmat sha kiwei pat ki seng saiñ pyrthei, ha kaba hadien ki la rai ban pynïasoh bad ka seng BJP.
Kiba bun ki MLA ki la phah ïa ki shithi iehnoh kam ha ki Social Media bad ki la ther ïa ka seng Aam Aadmi Party (AAP) halor ka jingbamsap bad kiwei kiwei ki kam.
U Madan Lal, u MLA ba mih noh na Kasturba Nagar, u ïathuh ba kine ki MLA jong ka AAP, kynthup ïa u, ki la iehnoh ïa ka jinglong dkhot ba hakhmat eh jong ka seng.
Ha ka shithi iehnoh kam jong ka Bhawna Gaur kaba la thoh sha u Arvind Kejriwal u heh nongïalam jong ka seng, ka la ong, “Da kane nga iehnoh kam ïa ka jinglong dkhot ba kongsan jong ka Aam Aadmi Party namar ba nga la duh jingshaniah ha phi bad ha ka seng.” Ka Gaur ka la ïohlong MLA arsien na Palam.
Haba ther tyngeh ïa kine ki MLA, ka nongaiktien ka AAP ha ka ri ka Reena Gupta ka la ong ba ka jingwad bniah kaba la pynlong da ka seng ka la lap ba baroh ki long ki bym ïajan bad ki paidbah ha la ki jong ki jong ki konstitwensi bad dei na kata ka daw ba ki la shah kyntait ban ïoh tiket.
“Ngim shym la ai tiket ïa ki namar ka jingmih kaba sniew jong ka jingwad bniah. Ka jingshisha ba mynta ki leit sha kawei pat ka seng hadien ba la kyntait ïa ki tiket kam dei ka kam kaba heh. Ka dei ka bynta jong ka saiñ pyrthei,” la ong ka Gupta.
Ka AAP ka la bujli ïa ki 16 ngut ki MLA ba mynta da ki bathymmai na ka bynta ka ilekshon ha ka 5 tarik, Rymphang.
