Shillong, Rymphang 03
Ki kyrtong ba la thep kyrteng ban ïakhun ïa ka ilekshon MDC na Mawlai baroh 6 ngut ki long kiba bit ban ïakhun ïa ka ilekshon, hadien ba la dep bishar ïa ki kot ki sla ha ka Lah Sngi U Blei ka 3 tarik Rymphang, kaba dei artat ka sngi khatduh ïa baroh ki kyrtong ban thep kyrteng.
Ka jingïakhun ïa ka ilekshon MDC ha Mawlai ka long kaba itynnat bha, namar ki don haduh 6 ngut ki kyrtong kiba la mih ban aireng, kynthup haduh 3 ngut ki kyrtong shimet bad 3 ngut pat kiba mihkhmat ïa ki seng saiñpyrthei ba kynthup ïa ka Indian National Congress (INC), Bharatiya Janata Party (BJP) bad Voice of the People Party (VPP), kiba la don lypa ïa la ka shap jong ki seng ba ki mihkhmat.
Katba, na ka bynta ki kyrtong shimet ba ïakhun ïa ka ilekshon na Mawlai ki don 3 tylli ki shap ba kynthup ïa u Mawbynna, Mawlynnai bad Mohkhiew.
Kine 3 ngut ki kyrtong kiba ïakhun kum ki kyrtong shimet ki long u MDC ba mynta, Bah Teiborlang Pathaw ha ka shap jong u Mawbynna, Bah Seibor L Nonglait ha ka shap jong u Mawlynnai, bad u MLA/MDC barim ka Mawlai, Bah Process T Sawkmie ha ka shap jong u Mohkhiew.
Kiwei pat ki kyrtong ki long u Bah Wanseng Jyrwa (INC) ha ka shap jong ka Kti, Kong Daniella Nonglait (BJP) ha ka shap jong u syntiew Lotus bad u Bah Eddieson Kharumnuid (VPP) ha ka shap jong u Prah.
