Kolkatta, Rymphang:
Ka seng Trinamool Congress ha ka sngi Ba-ar ka la dawa ban pynkylla kyrteng noh ïa ka West Bengal kum ka ‘Bangla’ da kaba ong ba kane ka kit ïa ka jingsoi jong ka histori bad ka kolshor jong ka jylla.
Haba wanrah ïa kane ka mat lyngba ka jingkren ha ka kynta kylli jingkylli ha Rajya Sabha, ka MP jong ka seng ka Ritabrata Banerjee ka la ong ba ka West Bengal Assembly ha u bnai Naitung, 2018 da kawei ka sur ka la mynjur ïa ka Resolution ban pynkylla kyrteng noh ïa ka jylla hynrei haduh mynta ka sorkar kmie kam pat mynjur satia ïa kane.
U la ong ba ka Myntri Rangbah ka West Bengal ka Mamata Banerjee ka la thoh sha u Myntri Rangbahduh ka ri u Narendra Modi da kaba ong “ka jingbuh kyrteng biang kan long katkum ka histori, ka kolshor, bad ka jinglong kyrpang jong ka jylla jong ngi bad kan pyni ïa ka jingangnud jong ki briew jong ngi”.
Ka jingpynïakhlad ha u snem 1947 ka la phiah ïa ka Bengal – ïa ka liang jong ka India la khot West Bengal bad ïa kawei pat ka liang la khot East Pakistan. Ha u snem 1971, ka East Pakistan ka la pynbna ïa ka jinglaitluid bad la pynlong ïa ka jaitbynriew thymmai jong ka Bangladesh.
Mynta ka sngi, kam don satia ka East Pakistan, u la ong. “Ka kyrteng jong ka jylla jong ngi ka donkam ban pynkylla. Ka hukum jong ki paidbah ka West Bengal ka donkam ban burom.”Ka kyrteng jong kano kano ka jylla la pynkylla khatduh ha u snem 2011, ha kaba ka Orissa ka la kylla long ka Odisha.
Bun ki nongbah ki la ïohi ïa ka jingkylla kyrteng ha ki snem kiba la leit noh. Kine ki kynthup ïa ka Bombay, kaba la pynkylla sha ka Mumbai ha u snem 1995, ka Madras sha ka Chennai ha u snem 1996, ka Calcutta sha ka Kolkata ha u snem 2001, bad ka Bangalore sha ka Bengaluru ha u snem 2014.
U Debashish Samantaray jong ka BJD u la pan ïa ka kyrdan jong ka jinglehkmen jong ka ri na ka bynta ka Bali Jatra. Ïa kane ka tamasa la ju pynlong ha ki rud jong ka wah Mahanadi man la u snem ban kynmaw ïa ka por jong ka snem ha kaba ki nongleit jingleit na kane ka jylla ki leit sha Bali, Sumatra bad Java ha Indonesia, Borneo bad Sri Lanka ha ki por hyndai na ka bynta ban pynïar ïa ka khaïi pateng bad ka kolshor.
U Saket Gokhale jong ka TMC u kwah ka jingmyntoi na ka jingpynduna dor ïa ka ethanol ha ka umphniang petrol kan leiti sha ki nongthied katba ka para dkhot jong ka seng ka Sushmita Dev ka kwah ba dei ban tih ïa ka wah Barak ha Assam bad ban pyndonkam ïa ka lynti um na ka bynta ban pynïaid ïa ki mar ki mata.
Ka Kavita Patidar jong ka BJP ka la dawa ba dei ban pyndonkam da ki rukom pynneh pynsah ïa ka um kum ka jingpyndap biang ïa ka um hapoh khyndew ban weng ïa ka jingeh jong ka jingshlei um ha ki lynti rel Underpass.
Ka PT Usha (Nominated) ka la pan ban buh ïa ka AIIMS ha Kinaloor ha Kozhikode distrik jong ka Kerala.
Haba pynpaw ïa ka jingktah jong ka jingkylla ka suiñbneng ïa ka rep ka riang, u S Selvaganabathy (BJP) u la ong ba ka jinglong ka suiñbneng kaba khlem thikna ka la ktah ïa ka jingmih jong ki jingthung, kaba la wanrah ïa ka jingduhnong kaba khraw ïa ki nongrep.
