Chandigarh, Rymphang:
U Myntri Rangbah ka Punjab, u Bhagwant Mann, ha ka Sngi Ba-ar, u la pynrem jur ïa ka jingujor ejahar pyrshah ïa ka Myntri Rangbah jong ka Delhi, ka Atishi bad u la buh jingkylli, hato ka kam jong ki pulit ka Delhi bad ka Election Commission ka long beit tang ban sangah ïa ka Aam Aadmi Party?
Ki pulit ka Delhi, ki la buh da ka jingujor ejahar ha ka Sngi Ba-ar pyrshah ïa ka kyrtong jong ka seng AAP ka Atishi na Kalkaji, halor ka jingkynnoh ba ka la pynkheiñ ïa ka Model Code of Conduct (MCC) bad ba ka la khanglad ïa ki briew jong ka sorkar jylla kiba don ha ka kam.
Katkum ka jingïathuh ki pulit, ka Atishi ka la don ryngkat bad ki nongkyrshan jong ka seng AAP kiba la kynnoh ba ki la khanglad ïa uwei u ophisar ban leh ïa ka kam jong u ha Fateh Singh Marg. La kynnoh ba arngut ki dkhot jong ka AAP ki la thombor ïa uwei u pulit langrut.
Haba kynthoh halor ka ejahar, u Mann u la ther tyngeh ïa ki pulit jong ka Delhi bad ïa ka Election Commission, da kaba kynnoh ba ki leh shiliang khmat pyrshah ïa ka AAP.
“Ha ka jaka ban ujor ejahar pyrshah ïa ka jingleh donbor jong ka BJP ha Delhi, la buh jingmudui mukotduma pynban pyrshah ïa ka Myntri Rangbah ka Delhi halor ka jingujor ba la ujor da ka Election Commission, kaba dei ban pynrem jur,” la ong u Mann ha ka jing-thoh ba la phah ha ka rynsan X.
“Hato ka kam jong ki pulit ka Delhi bad ka Election Commission ka dei ban thom tang ïa ka Aam Aadmi Party? Ki briew kiba ïadei bad ka BJP ki sam pathar ïa ki kyiad, pisa bad ki mar ki mata, ki pynkheiñ ïa ka Model Code of Conduct, hato ym shym la ïohi ïa ki?,” la kylli u Mann ha ka jingpyllait khubor ha Punjab.
