Srinagar, Rymphang:
Shisngi hadien ba ki suba lehnoh ki la pynïap ïa uwei u shipai uba la shongthait bad pynmynsaw ïa ka kurim jong u bad ka khun ruit ha ka bynta ba shaphang Shathie jong ka Kashmir, ki pulit jong ka Jammu & Kashmir ki la kem ïa palat 500 ngut ki briew na kylleng ka them Kashmir.
Kiba bun na kiba la shah kem ki dei ki bahaïing-bahasem jong ki lehnoh Kashmiri kiba don ha Pakistan bad Pakistan-Occupied Kashmir (PoK).
“Ki la don ki jingshah kem kiba jur bha ha kylleng ki jaka jong ka Kashmir Valley bad ka jingkheiñ ka la palat bha ïa ka 500 ngut,” ong uwei u heh pulit ha ka jingïakren bad ki nongthoh khubor. “Ngam kynmaw ïa ki jingshah kem ha kane ka rukom ha ki por ba dang shen hadien ka jingshah thombor jong ki lehnoh,” u la ong.
U heh pulit u la batai ba ïa ki jingshah kem la leh ban phah khubor sha ki lehnoh “kiba treikam na shiliang pud ba kum kine ki jingshah thombor kin ym lah ban pdiang “, bad ba ha ki por ba la leit noh, “ka jingphah ïa kum kine ki khubor ka la ïohpdiang ïa kiei kiei kumba la kwah”.
Kumba ka la jia la ong ba ki riew kieng atiar ki bym lah ban ithuh ha ka lah sngi U Blei ki la siat ïa u shipai ba la shongthait, u Manzoor Ahmad Wagay, ka kurim jong u bad ka khun ruit jong ka ha ka shnong Behibagh ha Kulgam ba Shathie jong ka Kashmir. Katba u Wagay (45) u la shah siat na ka kpoh u la khlad noh ha kane ka jingshah thombor, ki arngut ki kynthei ki la shah siat na ki kjat bad mynta ki dang shah sumar.
Katba ki pulit, ha kine ki khyndiat snem ba la dep, ki la buh ban ïaleh pyrshah ïa ki lehnoh Kashmir kiba don ha Pakistan da kaba kurup ïa ki ïing ki sem bad ki mar ki mata jong ki ha ka them Kashmir, kane ka dei ka sien kaba nyngkong ba ïa ki dkhot ki longïing bad kiba haïing hasem jong ki la kem ha kajuh ka por ha ka jingbun kaba kum kane.
