Bengaluru, Rymphang:
Ka saiñ hima-sima jong ka Karnataka, ka dang sakhi ïa ka jingïakynad kaba jur katta-katta ha kaba u nongïalam ka liang pyrshah u R Ashoka u la kynnoh ba u Myntri Rangbah ka jylla, u Siddaramaiah, un hiar shuki noh ha ka 15 ne 16 tarik u Naiwieng, namar ka jingïaknieh bor hapoh ka seng Congress kaba bat ïa ka jingsynshar.
U la kynnoh ba ka jingïakajia kaba dang ïai bteng hapdeng u Siddaramaiah bad u Symbud Myntri Rangbah DK Shivakumar ka pyntlot ïa ka sorkar.
“Kam don ka jingsynshar kaba biang ha Karnataka; ki bunkam ban ïakhun na ka bynta ka shuki jong u Myntri Rangbah. Ka dei u Siddaramaiah pyrshah ïa u DK Shivakumar,” la ong u Ashoka. U la kdew ruh ïa ka jingeh jong ka Microfinance kaba ktah ïa ki nongrep, da kaba kam ba ka la pynlong ïa ki ban pynïap ïalade, bad kynnoh ïa ka sorkar Congress ba kam shym la lah ban wanrah ïa kano-kano ka jingkiew kaba paw ha kine ki ar snem ba la dep. “Ha ka shiteng bnai jong u Naiwieng, u Siddaramaiah un sa mih noh, bad u Myntri Rangbah ba thymmai un sa shimti ïa ka shuki. Ki MLA ka Congress ki ïa phiah, bad kane ka sorkar ka don ha ICU,” u la kynthoh.
Haba bynrap shuh-shuh ïa ka jingkynnoh, u Myntri ka sorkar pdeng uba dei ruh u Myntri Rangbah barim ka Karnataka, u HD Kumaraswamy, u la ïathuh lypa ba ka sorkar ba la ïalam da ka Congress, kan ym neh haduh u snem 2028.
U la kdew ïa ka jingbym sngewhun kaba nang kiew hapdeng ki MLA ka Congress, kum ka daw bah kaba pynthut ïa ka shongsuk-shongsaiñ.
“Kane ka sorkar kan ym neh haduh ka samoi treikam ba pura jong ka. Ka jingbym sngewhun ka nang kiew hapdeng ki nongthaw aiñ jong ka Congress, bad katba ngim pat tip lano kan khyllem, hynrei ka long kaba ym lah ban lait,” ong u Kumaraswamy ha ki nongthoh khubor. Da kaba kyntait ïa ki jingkynnoh ba ka liang pyrshah ka pyrshang ban pynhap ïa ka sorkar, u la kynthoh, “Dei ki MLA jong ki hi bad ki paidbah jong ka Karnataka kiba pyntlot ïa ka nongrim jong kane ka jingsynshar.”
U Kumaraswamy u la kynnoh shuh-shuh ba ka jingbym don pisa na ka bynta ka roi ka par ka la khanglad ïa ki MLA ka Congress ban ïatreilang bha bad ki konstitwensi jong ki, kaba la pynmih ïa ka jingbym sngewhun hapoh ka seng. “Ki sngewsih jur ïa ki kam jong ka sorkar, bad shen kane ka jingbym sngewhun kan sa paw shabar,” u la ong, da kaba pynpaw ïa ka jingeh ha ka saiñ hima-sima kaba lah ban mih ha ki por ban wan.
Hapdeng ka jingbym thikna kaba la nang jur, u MLA ka Congress u BR Patil u la iehnoh ïa ka kam kum u nongai jingmut ha ka saiñ hima-sima jong u Myntri Rangbah ka jylla u Siddaramaiah ha ka 31 tarik, Kyllalyngkot. Ha kaba ïadei bad kane um shym la pynpaw ïa ki daw kiba sha lyndet halor kane ka rai jong u.
