Chandigarh, Rymphang:
Hadien ka jingshah rem kaba pynjah burom ha ka ilekshon sha ka ïingdorbar thawaiñ jong ka Delhi, ka AAP ha Punjab ka lah ban mad ïa ka jingïakynad hapoh jong ka seng bad ka jingïapait kaba lah ban mih, ong u nongïalam ka Congress bad u LoP u Partap Singh Bajwa ha ka Sngi U Blei.
Une u nongïalam ba la rim bha jong ka seng Congress u la kdew ba palat 30 ngut ki MLA jong ka AAP ki la ïakynduh bad ka seng jong u la jan shisnem, kiba la pynkhreh ban kylla liang.
“Ka thma nongïalam mynta ka la jan, namar ki nongïalam jong ka seng ha ka nongbah ki lah ban kwah ban bujli ïa u Mann, khamtam namar ba baroh ki MLA bad ki nongbud ka seng ha ka jylla ki ïatylli bad u nongpynïaid jong ka seng, u Arivnd Kejriwal. Ka ilekshon shiteng samoi kan long ha Ludhiana (West) Assembly konstitwensi. U Kejriwal u lah ban peit bniah ïa kane ka shuki ban ïasoh bad ka ïingdorbar jong ka jylla”, u la pynshisha.
U Kuldip Singh, uba long u nongkhmih bniah ba pawkhmat jong ka kam saiñ pyrthei, u la ong, “Baroh ar tylli ki seng Congress bad ka BJP kin kwah ba ka AAP kan phiah ha Punjab namar ba ki kheiñ ïa ka kum ka jingïakhun pyrshah kaba khraw ha ka ilekshon sha ka ïingdorbar thawaiñ jong u snem 2027. Lada u Kejriwal u rai ban ïakhun na Ludhiana (Sepngi), ka lah ban long kaba pynsniew ïa ka seng bad ka lah ban pyni ïa ka jingkut jong ki jingangnud riewlum jong u.”
Haba kyntait ïa kitei ki jingkynnoh, u nongaiktien jong ka Punjab AAP, u Neel Garg, u la pynskhem, “U Kejriwal, u dei u nongpynïaid ïa ka ri jong ngi bad u Mann, u dei u Myntri Rangbah ka Punjab. Ka Graph jong ka Congress ka hiar stet bha. Ha Delhi, ka la ïoh 0 ha ki lai sien lynter. Ha ka ilekshon Punjab jong u snem 2022, ka la don tang 18 ngut ki MLA, ka ban sa nang pynduna shuh shuh ha ka ilekshon jong u snem 2027. Tang ban peit ïa ka ilekshon Municipal ba dang shen ha ka jylla – kaei ka jingleh jingkam jong ka Congress?”
“U Bajwa u dei ban sngewkhia ïa ka Congress ba kam jop wat tang shi seat ruh ha Delhi”, la bynrap biang u Garg.
