New Delhi, Rymphang:
U heh nongïalam jong ka seng Aam Aadmi Party (AAP ) u Arvind Kejriwal, u la khot ïa ka jingïalang bad ki nongthaw aiñ jong u na Punjab, hapdeng ki jingkynthoh, halor ka jinglah ban mih noh na katei ka seng, kaba la shah beh noh na ka bor ha Delhi, ha ka taïew ba la dep, ong ki lad pathai khubor.
U Kejriwal u la khot ïa kane ka jingïalang ha ka Sngi Ba-ar, kata mynta ka sngi hadien ba katto katne ngut ki nongïalam ka Congress na kane ka jylla ki la kam ba palat 30 ngut ki MLA ka AAP Punjab ki don ka jingïadei bad kane ka seng.
U nongïalam ka liang pyrshah ha Punjab bad u MLA jong ka Congress, u Partap Singh Bajwa u la ong ha ki nongthoh khubor kumne, “Peit, phi la sot ïa ka ktien jong u R.P Singh. Nga ruh ngam tip nangno kane ka jingkheiñ ka wan. Phi shu ïathuh ïa nga ba dei u RP Singh uba la kren ïa kata, kumta nga shu kyrshan ïa kaei kaba phi la kren. Ngam shym la don kano kano ka jingïakren bad u RP Singh.”
Halor ka jingpynbor shuh shuh, u Bajwa u la ong, “Ym dei uwei ne ar ngut, palat 30 ngut. Bad ki la ïakynduh ïa nga lajan shisnem mynta. Ki kloi ban iehnoh ïa kine ki briew.”
Ka AAP, ka seng kaba la kha ha Delhi na ka jingïakhih pyrshah bamsap, ka la rung ha ka bor synshar ha Punjab ha u snem 2022 da kaba pynhap noh ïa ka Congress da ka jingbun ki seat.
Ka seng kaba don ïa ka jingangnud ban ïoh ïa ka ri ka la jop 92 tylli na ki 117 tylli ki seat ban pynhap ïa ka Congress na ka jingsynshar ha Punjab.
Ha ka sngi Saitjaiñ ba la dep, ki jingthmu ban pynïar jong ka AAP ki la ïoh ïa ka jingkhihwin kaba khraw hadien ba ka la shah jied ban weng noh ïa ka bor ha ka nongbah ba skhem jong ka ha kaba ka Bharatiya Janata Party (BJP) jong u Myntri Rangbahduh ka ri u Narendra Modi ka la wan ha ka bor synshar ha ka sien kaba nyngkong ha ka spah snem kaba 21.
Ka BJP ka la shah jied na ka bor synshar ha u snem 1998 da ka Congress, kaba la jia shwa ka jingsynshar jong ka AAP ha katei ka nongbah ha kaba katto katne ki bor ki shong ha ka sorkar pdeng.
Ka AAP, kaba la jop 62 na ki 70 tylli ki seat ha Delhi ha u snem 2020, ka la hiar sha ka 22 tylli ha ka ilekshon ha ka 5 tarik u Rymphang katba ka BJP ka la jop 48 tylli ki seat ha ka jingïakhun kaba la jan long hapdeng u Myntri Rangbah barim ka Delhi, u Arvind Kejriwal bad u Myntri Rangbahduh ka ri, u Narendra Modi.
Ka jingshah ktah na ka jingshah rem jong ka AAP ha Delhi ka long haduh katta katta ba baroh ki nongïalam bahakhliehduh jong ka lait noh tang ka Myntri Rangbah barim ka Atishi ki la shah rem na la ki jong ki jong ki konstitwensi.
