Thiruvananthapuram:
Ka Sorkar Kerala kan mang T.750 klur na ka bynta ban pynbiang ïa ki jingdonkam jong ki briew kiba la lait im na ka jingtwa khyndew ha Wayanad, la pynbna u Myntri ka tnat pla tyngka jong ka jylla u KN Balagopal ha kine ki khyndiat sngi ba la leit haba wanrah ïa ka mang tyngka ba man u snem na ka bynta u snem mang tyngka (FY) 2025-26 ha ka ïing dorbar thawaiñ.
Ki la don palat 250 ngut ki briew ki la ïap ha ka jingtwa khyndew ha ki shnong Chooralmala, Mundakkai, bad Punchiri Mattam ha Meppadi panchayat ha u bnai Naitung jong u snem ba la lah.
U Balagopal u la kynthoh ïa ka Centre ba kam shym la mang ïa ka song tyngka kaba kyrpang na ka bynta ka jingpynbha ïa ka Wayanad ha ka mang tyngka jong ka sorkar pdeng watla ka jylla ka la ai ïa ka “jingbuhkynmaw ba bniah kaba T.2221 klur” ha u bnai Naiwieng jong u snem ba la lah.
“Ka jylla kan pyndonkam ïa ka pisa na ka pisa ai jingïarap jong u Myntri Rangbah ka jylla (CMDRF), ka bor pynïaid ïa ki jingjia basngewsih jong ka jylla (SDMA) bad kan pyrshang ban ïoh ïa ka jingkyrshan jong ki riew shimet ban pyndep ïa ka projek ban pynbha pat,” ong u Balagopal.
U Myntri Rangbah ka jylla u Pinarayi Vijayan u la pynbna ha ka 2 tarik, Kyllalyngkot ba ïa kiba lait im na ka jingtwa khyndew ha Meppadi, Wayanad kiba la duh ïa ki ïing ki sem bad ki jingdon jingem jong ki ha katei ka jingjia ba sngewsih yn pynbha pat ïa ki ha ki ar tylli ki Model Township kiba la pyndep da ki jingtei kiba lah ban ïaleh pyrshah ïa ki jingshah pynjulor bad kiba lah ban pyndap pynbiang ïalade.
U Vijayan u la ong ba ïa ki shnong yn pynbiang ïa baroh ki jingdonkam kum ki skul, ki Anganwadi, ki hospital bad ki jaka sumar bad ki jaka lehkai.
Ka kynhun Myntri jong ka jylla ka la mynjur ïa ka Master Plan na ka bynta ka projek pynbha kaba heh kum shi bynta jong ka ha kaba ki shnong kin wan ha ka jaka kaba heh 58.50 hectare jong ka Elstone estate ha Kalpetta Municipality bad 48.96 hectare jong ka jaka jong ka Nedumpala ha ka Meppadi panchayat.
Ka High Court kham mynshwa ka la ailad ïa ka sorkar jylla ban shim ïa katei ka jaka na ki trai riew shimet katkum ki kyndon jong ka Disaster Management Act, 2005.
Ha ki por mynstep jong ka 30 tarik u Naitung, 2024, ki jingtwa khyndew kiba bunsien ha ka Meppadi Panchayat ha Wayanad ki la pynpra ïa ym duna ïa ka lai tylli ki jaka sah briew kiba bun briew, kaba la pynïap ïa palat 250 ngut ki briew bad kaba la pynskhem ïa ka jaka ha ka khana mynnor jong ka jylla kum ka jingjia ba shyrkhei tam na ki bor ka mariang.
Ka jingjia hadien ka la pynlong ïa ym duna ïa ka 400 ngut ki briew kiba la tieng ban ïap (kynthup ïa kito kiba la jah) bad ki longïing bym lah kheiñ ki la shah pynkynriah jaka, kaba pynpaw ïa ka jingdonkam ban pynbha pat ïa ki.
