Raipur, Rymphang:
Hadien ka jingïasiat bad ki Maoist ha ka jaka khlaw Bijapur ha Chhattisgarh, ki shipai ki la pynkhlaiñ bha ïa ka jingpahara, bad ka jingkhynra ka la nang jur ha ki shnong ba la shah ktah ha ki Maoist kiba hap ha khappud jong ka Telangana bad Chhattisgarh.
Ki shnong ki kynthup ïa ka Kannaigudem, Wazeedu, Venkatapuram, Peruru, bad ka Mangapeta hapoh ka Eturunagaram division, ha Mulugu distrik. Ka Bijapur ruh ka don ha khappud jong kine ki ar tylli ki jylla.
Katkum ki tyllong khubor ba la ïohlum, ki pulit ki la pynlong ïa ka jingkhynra kaba jur ïa ki kali ha ki jaka ba hap hapoh ka jingkhmih jong ki.
La bthah ïa ki nongshong shnong ban pyntip sha ki pulit lada don kano kano ka jingleit jingwan kaba suba jong ki briew ki bym tip kyrteng ha kine ki jaka kaba don marjan bad ka wah Godavari, kaba phiah ïa ki ar tylli ki jylla.
Haba ïakren bad ki lad phah khubor, u Superintendent of Police jong ka Mulugu u Dr P Shabarish u la ïathuh ba ki dang ïoh jingtip man ka taïew ïa ka jingïaid ki Maoist ha ki thaiñ khappud.
U la bynrap ba ki pulit ki pyndonkam da ki Drone Camera ha ki jing-leit thwet ban lap ïa ka jingshang jong ki Naxal.
Ki kynhun ba kyrpang jong ki pulit ki dang leit jngoh ïa ki riewlum bad kyrpad ïa ki ban pyntip sha ki pulit lada don kano kano ka jingleit jingwan jong ki briew kiba isuba sniew.
