Bengaluru, Rymphang:
Ka jingpyninam da ki liengsuiñ kaba heh tam ha Asia, ka Aero India-2025, ka la sdang ha Air Force Station Yelahanka ha Bengaluru ha ka Lah Sngi U Blei ryngkat ka jingkhot da u Myntri ka tnat Pohïing u Rajnath Singh na ka bynta ka jingïatreilang bad ka jingïasnohktilang kaba kham khraw hapdeng ki ri kiba ïajan ban pynthikna ïa ka jingshong suk shongsaiñ bad ruh ïa ka jinglong jingman kaba kham bha ha ka pyrthei.
Ka jingpyni ba phylla ïa ki buit ïada bad ki buit ba thymmai ha ka liang ka liengsuiñ, bad ka jing-lehkai Aerobatic da ki liengsuiñ ïapom bad ki liengsuiñ ka la pynlong ïa ka jingsdang jong ka jingpynmih kaba 15 jong ka Aero India. U Singh u la batai ïa ka kum ka “Maha Kumbh” jong ka jingïatreilang bad ka jingpyni ïa ka bor jong ka India ha ka kam ïada ri bad ka kam suiñbneng, katba u pyni ïa ka jingïasyriem bad ka Maha Kumbh kaba dang ïaid ha Prayagraj ha Uttar Pradesh.
U la ong ba ka jingthmu bakongsan jong ka Aero India ka long ban pyni ïa ka jinglah jong ka India ha ka kam karkhana bad ka jingkiew ha ka liang ka teknoloji sha ka pyrthei baroh kawei bad ruh ban pynkhlaiñ shuh shuh ïa ka jingïadei bad ki ri kiba ïajan.
“Ngi ju ïakynduh kum ki nongthied bad ki nongdie, ha kaba ka jingïadei jong ngi ka long ha ka kyrdan jong ka jingïadei.
Hynrei ha kawei pat ka kyrdan, ngi thaw ïa ka jingïatreilang jong ngi shabar jong ka jingïadei nongthied bad nongdie sha ka kyrdan jong ka jingïatreilang ha ka kam karkhana. Ngi don shibun ki nuksa kiba jop jong ka jingpynmih bad jingpynroilang bad ki ri kiba don kajuh ka jingmut jingpyrkhat,” u la ong ha ki nongïashim bynta na ki ri kiba ïajan.
Ki Myntri ka tnat ïada ri bad ki heh ophisar ka tnat pohïing na kiba bun ki ri kiba ïajan ki ïashim bynta ha kane ka jingpyninam.
U Singh u la ong ba katba ki nang pynkhraw ïa ka jingjylliew jong ka jingïadei jong ki, ka jingjop jong ki kan kiew sha ki kyrdan kiba kham heh.
“Na ka bynta jong ngi, kam don ka jingshngaiñ jong ka ri India ne ka jingsuk jong ka ri India ha ka jinglong marwei. Ka jingshngaiñ, ka jingshong suk song saiñ ki dei ki jingtei ba ïasamlang kiba ïaid lait ïa ki pud ki sam jong ka ri. Ka jingdon jong ki paralok bar ri ka long ka sakhi ba ki paralok jong ngi ki ïasam ïa ka jingthmu jong ngi kum kawei ka Pyrthei, kawei ka longïing, kawei ka lawei,” u la ong.
U Rajnath Singh u la bynrap ba ki donkam ban ïatreilang ban ïakhun ïa ki jingeh kiba mynta bad ban jop ïa ki jingeh kiba thymmai.
Haba pynphai sha ïing ïa ka jingdonkam ban ïatreilang kaba kham khraw, u la ong, “Ym lah ban ïoh ïa ka jingsuk ha ka jinglong kaba tlot jong ka jingshngaiñ. U dieng bilat jong ka jingsuk u lah ban ïeng tang ha ki tynrai jong ka jingkhlaiñ. Ngi donkam ban ïatreilang ban long kiba khlaiñ bad ban pynthikna ïa ka jinglong jingman ha ka pyrthei kaba kham bha.”
U la ong ba ha ka jinglong jingman kaba mynta jong ka jingbym thikna ha ka pyrthei, ka ri India ka sakhi ïa ka jingsuk bad ka roi ka par.
“Ka India kam pat ju hiar thma ïa kano kano ka ri bad kam pat ju don bynta ha kano kano ka jingïakhun pyrshah ïa ki bor bah. Ngi la ju long ki nongïasaid aiñ ïa ka jingsuk bad jingshong suk shongsaiñ”, u la ong.
U la ong ha ki Myntri ka that ïada ri, ki heh ophisar bad ki nongmihkhmat na kiwei pat ki ri ba ka jingïatreilang jong ki bad ka India ka long kaba kongsan bha na ka bynta ka jingsuk, ka jing-roi jingpar, bad ka jingshong suk shongsaiñ ha ka pyrthei.
U la ong ba ka jingshna tiar ïada hapoh ka ri bad ka jingshalan ïa ki tiar ïada shabar ri ka la ïaid lait ïa ki rekod kaba T.1.25 lak klur bad T.21,000 klur, bad ki la kular pura ban ïohi ïa ka jingkiew kaba tam bun ha kita ki jingkheiñ.
Ki don haduh 452 ngut ki nongpyninam na India bad 57 ngut ki nongpyni nabar ri kiba ïashim bynta ha kane ka sngi.
Ha ka sien kaba nyng-kong, ka Aero India 2025 ka sakhi ïa ka jingïashim bynta jong ki ar tylli ki liengsuiñ ïapom jong ka pateng kaba phra kiba la tbit tam ha ka pyrthei – ka Su-57 jong ka Russia bad ka F-35 Lightning II jong ka America.
