Chandigarh, Rymphang:
U Myntri ka sorkar pdeng u Ramdas Athawale u la ong ba ka jingshah rem ha ka ilekshon sha Delhi Assembly ka dei ka jingkyndit kaba khraw ïa ka Aam Aadmi Party, ha kaba u la bynrap ba ka Punjab kan lait noh na ka kti jong ka AAP.
“Ka jingshah rem jong ka Delhi, ka dei ka jingkyndit kaba khraw ïa u Arvind Kejriwal. Ka jing-long jingman jong ka Punjab ruh kam long kaba bha,” la ong u Athawale ha ka lad phah khubor.
“Ki nongrep bad kiba duk kim don jingpyllait. Haba peit ïa ka ilekshon ha Delhi, u Arvind Kejriwal u pyrkhat ba ka lah ban don ka jingkulmar bad dei na kata ka daw ba u lah ban khot ïa ka jingïalang. Ka Punjab kan sa lait noh shen na ki kti jong ki,” u la bynrap.
U Myntri Rangbah ka Punjab, u Bhagwant Mann bad ki MLA ka AAP na katei ka jylla, ki la ïakynduh ïa u Kejriwal ha ka nongbah jong ka ri, ha ka sngi Ba-ar.
Hadien ka jingïalang, u Mann u la ong ba u Kejriwal u la ai khublei ïa ki MLA kiba la trei shitom ha ka ilekshon Delhi.
Haba kynthoh ïa ka rai jong ka TMC ban ïakhun laitluid ïa ka ilekshon sha ka ïingdorbar thawaiñ jong ka West Bengal, u Athawale u la ong ba ka kynhun INDIA ka don ha ka kyrdan kaba la pra.
“Ki la ïatehlok ha u snem 2024 hynrei ka TMC jong ka Mamata kan ïakhun laitluid ha ka ilekshon dorbar thawaiñ 2026. Kata ka long kaba dei namar ba ym don shuh ka Congress kaba sah… Ka INDIA Alliance ka la pra bad ngi pyrkhat ba ka lynti jong ngi ka la shai bha na ka bynta ka ilekshon 2029… Ki paidbah ki don ka jingshaniah ha u Myntri Rangbahduh u Modi,” la ong u Myntri ka sorkar pdeng.
Ha kajuh ka por, u MP jong ka Shiv Sena (UBT), u Sanjay Raut, u la pynpaw ba kane ka nongïalam ka Trinamool, ka ju ïakhun “da kaba laitluid,” la ka long ha ka Lok Sabbha ne ha ka Ïingdorbar jylla.
Ha ka jingïalang bad ki nongthoh khubor ha ka nongbah jong ka ri, u MP jong ka Shiv Sena (UBT) u la ong ba wat hapdeng kane ka rai jong ka Banerjee ban weng noh ïa ka jingïadei bad ka kynhun INDIA ha ka jylla, ka dei ban bteng ban don ka “jingïakren” bad ka Congress namar ba ka seng ka dei ka bynta kaba khraw jong ka jingïatehlok.
“Ka Mamata Banerjee ka ju ïakhun laitluid–la ka long ha Lok Sabha ne ha Vidhan Sabha. Ka Congress ka dei ka bynta kaba khraw jong ka jingïatehlok jong ka INDIA bad ka dei ban ïai bteng beit ban don ka jingïakren bad ka Congress,” la ong u Raut.
Haba kren halor ka jingïakynduh hapdeng ki MLA ka Punjab AAP bad u Arvind Kejriwal u nongïalam ka seng ha Delhi hadien ka jingshah rem ha ka ilekshon ba dang shu kut shen ha Delhi, u Raut u la ong ba ka dei ka kam hapoh jong ka AAP ban pynïaid.
“Ka AAP ka synshar ïa ka Punjab bad ka bor pynïaid jong ka seng ka don ha Delhi. Kaei kaba bakla ban khot ïa ka jingïalang jong ka seng ban trei ïa ki buit treikam na ka bynta ka jingbha jong ka seng? Kaei kaba bakla? Ka dei ka kam hapoh jong ka seng jong ki,” u la bynrap.
