D H Kharkongor
Ha kawei ka liang ym sngewdei shuh ban dang ïa sngap ïa kine ki jingpadiah ki jong u Thylliej. Tangba lada u Thylliej khlem shyieng um padiah seh ha kum kane ka por te lano pat. Kaba katno tam haba u dei uba ju padiah wat ha kiwei kiwei ki por. U Thylliej khlem shyieng patde ruh un dang ïai dei hi u Thylliej khlem shyieng, uba ju btuit ruh phlar-shi-phlar. U bapli um lah lait khlem da kum btuit phlar-shi-phlar wei ba u don pat ruh ha ka jaka kaba shong snem. Ka jaka kaba da sngem ruh shirta jingim. Hynrei ngi baroh ngi dei ban ïaleh shitom ban tehlakam ïa la u jong u thylliej. Ngi dei ruh ban lah ban sharai ïa la ki jong ki rymmiang shyntur.
U Thylliej, wat lada u dei u jingthaw uba rit, ynda haba ïanujor bad kiwei kiwei pat ki dkhot met, pynban u don ha u ïa ka bor kaba radbah. Udei u jing-thaw uba ngi dei ban sharai bha naba u don ha u ïa ka bor ban ‘teh song kawei mlon’ ne ban ‘pynpait pynpra’. U don namar kata ïa ka bor ban wan rah ïa ka jingbha kaba ngi dei ban ïa angnud ne ïa ka huri-hura, kaba kat haduh ka jingïaleh markylliang, kaba ngi dei ban ïa kyiar raimaw-raidieng. U Thylliej khlem shyieng u lah ban dei ka ding kaba bam duh ne ka um kaba tem pynlip ïa ka ding kaba klang ban bam duh. Ka shong namar kata ha ngi iwei-pa-iwei kumno ngi pyndonkam ïa u. Ka dei ka jingshisha ba na u kan nym mih kano-kano ruh ka jingbha lada kam don shwa ka jingbha ha ka dohnud. To sngewthuh ba ka jingpynphai ñia kaba jem jai ka don bor ban tem noh jai wat ïa ka jingbitar shla katba ka jingpynphai ñia kaba khor ka nang pynjur shuh shuh pynban ïa ka pynbitar shla.
Kam eh ïa u briew ba un pynieit kat ban lah syndon ban sharai ïa ki mrad ki mreng hynrei ka eh pat ïa u ba un sharai dei rukom ïa la u jong u thylliej. Ka iap ka im ka shong ha u thylliej. U thylliej u don ha u ïa ka bor phylla kaba katban tei pynïeng wat ïa ka Nongbah ne ka jaitbynriew kumjuh kumba u don ha u ïa ka borphylla kaba kat ban pynkhyllem syndon pat de jraiñ ïa ka. Namar kata ka long lehnoh-ei ban ñiew ïalade uba beit ka jinglong jingim lada ym pat lah pat de ban sharai dei rukom ïa la u jong u thylliej. Lehnohei lada dang pynphai ñia pynban da ki ktien kiba ‘khor’. Kiba kum kaba kynton dieng tyllaw pynban.
Ka jinglong thut shen pat ruh kam dei kaba itynnad. Kumjuh ka jinglong kaba kloi ban domriang.
Ngin ïa iehnoh ïa katei ka bynta bad ngin ïa phai pat de sa sha ka jinglong ka jong u paidbah. Ym baroh u dei uba suk ban shukor ne uba suk ban ïai shukor lynter tait. Kaba katno tam ïa ki riew puson sani bha. Ki bym shu nguid tylli tyllan ïa kat kaba ki ïohsngew, kata, kiba nguid bad shyieng bad shruh lem bad ki satar ki sajap. Kiba ym tang ba ki shu ïohsngew hynrei kiba da shah shukor bha ruh dnong. Kiba da don shisha pat ruh ïa ka jingtbit ban da thew ban da woh ne ban da pynshong nongrim bha ïa kata kaba ki da shah shkor. Ym lah ban shukor ïa ki naba ki tip shai kino ki jingkular kiba lah ban urlong bad kino kiba dei tang ki jingkular, kata, kiba yn ïaisah tang ha ka jingkular. Ym lah ban shukor ïa u riewpuson, u bymshu shah ïalam beit thik tang ha la ki jong ki ‘jingsngew’ ne ki ’emotions’. Te kumta ym baroh uba shu tyllun lang kat shata sha ïatyllun lymbrum u paid.
Ym duh napdeng u paid uba thik kum u nongkhrong. Ym duh ki bym lehrain ban shu ïai khrong shyrta jingim. Kiba ïai khmih lynti tang ïa ka ‘jinglehisnei’. ïa ki uba lah ban ïai ‘ai’ u dei beit uba ‘bha’ bad kat uba lah ban kham ‘ai’ kham bun u dei uba kham ‘bha’. Ha kiba u ‘men klop’, u ‘men lute’, u ‘men awria’ u ‘buaid u tanglang’ ruh u dei beit uba ‘bha’, kaba katno tam lada u lah ban ‘ai’ ïa ki ha man ba ki khmih lynti. Namar ka jingkhwai myntoi ba ïa uta ki kloi ruh wat ban ïarap da ‘rap jot ne ïarap’ tyllep eitmiaw’. Ym duh kiba ‘khwan’ ban ioh doh kyndang lem na kano kano ka ‘bymhok’ ka ‘bymkhuid’.
Napdeng u paid ba ym duh ruh de kiba tlot than eh ka bor pyrkhat pyrdaiñ lane kiba duna than eh ka jingshemphang. Ki bym sngewthuh wat lada phi pyrshang sngewthuh katto katno ruh. Kiba ym lah ban pynsngewthuh ba ka ‘um ngap’ ka kham thiang, ka kham shngiam bad ka kham tei met tei phad ban ïa ka ‘kait’. Ym duh ruh de ki bym kwah ïa ka jingkylla. Kiba hun ïa kiei kiei tang kumne kumba ki long. Kiba yn duh noh ka ‘myntoi shimet’ lada wan ka jingkylla.
Ha kaba kut hap ban sngewthuh ïano bad da kumno ban pynsngewthuh. Ka long biej ban shu padiah lehnohei. Lehnohei ban ïatai ne ban ïathir bad kiba ym dei ban leh kumta. Hap, namar kata, ban tehlakam ïa la u jong u Thylliej, hap sharai ruh la ki rymmiang shyntur.
