Raipur, Rymphang:
Da kaba shim ïa ki sienjam kiba tyngeh pyrshah ïa ki 23 tylli ki hospital jong ki riew shimet, ka sorkar Chhattisgarh ka la pynsangeh noh ïa ka jingpynrung kyrteng jong ki hadien ba ka jingbishar bniah ïa ki rekod bad ki rukom treikam jong ki ka la lap ba ki don ki jingpynkheiñ aiñ bad ki jingleh thok kiba ïadei bad ki jingdawa thok hapoh ka Ayushman Bharat Pradhan Mantri Jan Arogya Yojana (PMJAY) jong ka sorkar kmie.
Ha ka sienjam kaba tyngeh ban weng ïa ki kam thok bad ki kam bym hok, ka tnat ka koit ka khiah ka jylla ka la pynkut noh ïa ki Licenses jong ki 15 tylli na ki 23 tylli ki hospital bad kiba bun ki jaka ai dawa ba kyrpang na ka bynta shisnem, katba ïa kiwei pat ki hospital la pynsangeh noh na ka bynta 3-6 bnai.
Ïa ka jingtohkit bad ki kam ba khlaiñ hadien la sdang hadien ba la ïoh ïa ki jingpynbna na ka tnad pyrshah thok jong ka ri kaba la thaw da ka tnad ka koit ka khiah ban buddien ïa ki kam thok bad ki kam bymhok, khamtam ha ki jingdawa dawai kiba suba, katba dang pyntreikam ïa ka rukom treikam pyrshah thok ba la kyrshan da ki tnad jong ki jylla.
La ai ruh ïa ki jingpynbna maham sha ki san tylli ki hospital da ka tnad ka koit ka khiah hadien ba la lap ïa ki kam thok ba la kynnoh ha ka skhim ka koit ka khiah. Ïa ki jingpeit bniah kiba la lap ïa ki jingbym ïahap bad ki jingleh bakla kiba kongsan la pynlong ha ki hospital shimet kiba don ha Raipur, Durg, bad Bilaspur.
U Myntri Rangbah ka jylla u Vishnu Deo Sai u la pynpaw biang ïa ka jingkular jong ka sorkar ban pynthikna ïa ka jingsumar kaba shngaiñ na ka bynta ki paidbah bad ban jur ba kano kano ka jingleh bymsuidñiew da ki hospital hapoh ka skhim Ayushman Bharat bad ka Shaheed Veer Narayan Singh Ayushman Swasthya Yojana yn ym shah. “Yn leh da kaba tyngeh pyrshah ïa kito ki hospital kiba leh ïa ki kam beaiñ bad kiba pynkheiñ ïa ki kyndon jong ki skhim jingïarap”, la ong u Myntri Rangbah.
U Myntri ka tnad ka koit ka khiah ka jylla u Shyam Bihari Jaiswal u la bynrap ba ka sorkar ka dang skhem ha kaba pynthikna ïa ka jinglong khuid ryngkat ka jingpeitngor kaba biang ïa ki skhim ka koit ka khiah, khnang ba ki nongïoh jingmyntoi kiba dei hok kin ïoh ïa ka lad kaba biang ban ïoh ïa ka skhim Ayushman.
Ha ka por ba bishar bniah ïa ki kot ki sla jong ki katto katne ki hospital, bun ki hospital bad ki jaka sumar nongpang kiba pawnam kim shym la ai ïa ki jingbatai kiba sngewhun, bad la lap ïa ki jingpynkylla ha ki dor ba la shim na ka bynta ka jingsumar, bad kumjuh ruh ha kiwei pat ki jingdawa Insurance.
