New Delhi, Rymphang:
Ka ïingbishar jong ka Rouse Avenue jong ka nongbah Delhi, ha ka Sngi Balang, ka la rai pynrem ïa u MP barim jong ka seng Congress, u Sajjan Kumar, ha ka mukotduma pyrshah ïa ki Sikh ha u snem 1984. Kane ka mukotduma ka ïadei bad ka jingshah pynïap jong u kpa bad u khun ha ka thaiñ Saraswati Vihar jong ka nongbah jong ka ri ha ka 1tarik Naiwieng, 1984.
Ïa kane ka kam la buh kyrteng ban ïasaid halor ka jingpynshitom ha ka 18 tarik u Rymphang. U Sajjan Kumar mynta u dang shah set patok shi jingim ha kawei pat ka mukotduma pyrshah ïa ki Sikh ha Delhi Cantt. U nongbishar ba kyrpang u Kaveri Baweja u la ai ïa ka hukum ban rai pynrem.
La pyni ïa u Sajjan Kumar hakhmat ka kashari na phatok Tihar ban pynmih ïa ka rai. La rai pynrem ïa u halor ka jingpynïap ïa u Jaswant Singh bad ïa u khun jong u, u Tarundeep Singh,
Ka liang pynngat ka ong ba ka kynhun runar kaba la kieng atiar ka la pyndonkam da ki lynti kiba heh ban lute, thang bad pynjot ïa ki mar ki mata jong ki Sikh ban siew kylliang ïa ka jingshah pynïap jong ka Myntri Rangbahduh barim ka Indira Gandhi.
Ki paidbah ki la pynïap ïa u Singh bad ïa u khun jong u bad ki la lute ïa ka ïing jong ki. Hadien kata ki la thang ïa ka ïing. Ka hukum jong ka ïingbishar ka la ong ba u Kumar um shym la ïashim bynta tang ha ka kynhun runar hynrei u la ïalam ïa ka.
Ka hukum jong ka ïingbishar ka la lap ïa ki tiar kiba biang ban thaw ïa ka “jingmut ba nyngkong eh ba um dei tang u nongïashim bynta, hynrei u la ïalam ruh ïa ka kynhun runar”.
U General Secretary ka Delhi Sikh Gurudwara Management Committee (DSGMC) u Jagdip Singh Kahlon da pdiang ïa kane ka rai jong ka kashari.
“U Sajjan Kumar, uba la lamkhmat ïa ka jingpynïap ïa ki Sikh 40 snem mynshwa, u la shah rai pynrem bad un shah pynshitom… Nga ai khublei ïa ka ïingbishar na ka bynta kane… Nga ai khublei ïa u Myntri Rangbahduh u Narendra Modi bad u Myntri ka tnat ki kam pohïing jong ka sorkar kmie u Amit Shah kiba la thaw ïa ka SIT hadien ba ki la wan ha ka bor. Kane ka dei ka jingmih na ka jingtohkit biang ïa ki mukotduma ba la khang… Ngi kyrmen ban ïoh ïa ka hok ha u Tygdish.
U Advocate u Anil Sharma u la ai jingmut ba ka kyrteng jong u Sajjan Kumar kam shym la don ha katei ka mukotduma naduh kaba sdang. La pynpaw ruh ba ka mukotduma ha kaba u Sajjan Kumar u la shah rai pynrem ha ka ïingbishar ba ha khlieh duh jong ka nongbah Delhi, ka dang sahteng ban ujor ha ka ïingbishar bahakhliehduh.
U nongmudui paidbah ba kyrpang u Manish Rawat ha ka jingpyrshah u la pynpaw ba u nongshah kynnoh um shym la tip ïa uba shah thombor. Ynda ka la tip mano ba dei u Sajjan Kumar, ka la jer kyrteng ia u ha ka jingthoh jong ka.
Kham ha shwa, u Senior Advocate u H S Phoolka u la mih na ka bynta ki lanot kiba shah thombor bad ïania da kaba ong ba ki pulit ki la pyndonkam bakla ïa ki jingtohkit ha ki jingjia jong ka thma paidbah pyrshah ïa ki Sikh.
U Phoolka u la kdew ïa ka rai jong ka ïingbishar ba ha khlieh duh jong ka Delhi bad u la pynpaw ba kam dei ka mukotduma kaba kyrpang, ka dei ka bynta jong ka jingpynïap briew kaba shyrkhei. Nalor kane, la pyninia da kaba ong ba katkum ka jinglum jingkheiñ ki la don baroh kumba 2700 ngut ki Sikh kiba la shah pynïap ha Delhi ha u snem 1984.
La jied nyngkong ïa u sha ka Municipal Corporation jong ka Delhi ha u snem 1977, bad u la bam smai kum u nongmihkhmat jong ka nongbah Delhi ha kajuh ka snem.
U riew saiñ pyrthei uba trei shitom na Delhi, u la jop ïa ka ilekshon Lok Sabha ha u snem 2004 na Outer Delhi.
U Sajjan Kumar u dei u MP barim ka Congress uba la shah rai pynrem bad shah set patok shi jingim ha ka mukotduma ba thombor pyrshah ïa ki Sikh ha u snem 1984 ha u snem 2018.
Ha ka 1 tarik Naiwieng, 1984, u Sajjan Kumar, katkum ka jingïathuh jong ki sakhi, ka la pynshit ïa ki paidbah ban thombor ïa ka jaitbynriew Sikh, ban kput ïa ka jingshah pynïap jong ka Indira Gandhi, ka Myntri Rangbahduh ha katei ka por jong ka Congress, kaba la shah siat ïap ha ki nongap pahara jong ka kiba dei ki Sikh, shisngi shwa.
