Shillong, Rymphang 13
Ka Meghalaya Powerlif-ting & Fitness Association (MPFA) ka la pyllait ïa ka almanak na ka bynta ki lympung ïalehkai rah nar ban pynlong na ka bynta u snem 2025-26.
Kane ka synjuk kan sdang shwa da ka 3rd Squat, Bench Press, Deadlift Championship 2025 (SBD) ka ban long ha ka 29 tarik u Lber 2025 ha Umsning, Ri Bhoi District.
Kane ka jingïakob ka long na ka bynta ki shynrang bad kynthei ha ka Open Category. Ha kajuh ka por kane ka synjuk ka la pynleit jingmut kyrpang ruh na ka bynta ki khynnah hapoh 14 snem bad kane ka long ka sien kaba nyngkong eh khnang ban pynshlur ïa ki ba kin shim bynta ha kane ka jait jingïalehkai naduh ba ki dangrit.
“Kan long kaba suk ban ai jinghikai ïa ki khynnah ynda ki la heh la san, hynrei kaba kham kongsan eh ka long ban kin ïoh ka jingshah hikai naduh ba ki dangrit,” la pynpaw u General Secretary u Bah Franky Nongrum haba ïakren bad ki nongthoh khubor ha ka sngi Palei.
Ha kawei pat ka liang u Treasurer u Bah Robinson Kharnari u la pynpaw ba ka jingïalehkai Powerlifting ka la long kaba paw bha haduh ka Meghalaya Games ha kaba ki khynnah ki la ïoh ban ïashim bynta ha ka jingïalehkai Weightlifting.
“Te kumta ngi kyrmen ba lyngba ka jingpynlong ka jong ngi ïa ka Powerlifting kan long ka jingïarap ïa ki samla jong ngi ba kin lait na ki jingsniew bad ruh ba kin pynleit jingmut ha kane ka jingïalehkai khnang ba kan plie lad pat ïa ki ha ka ïohkam ïohjam.”
“Ha katei ka 29 tarik yn pynlong lang ha kajuh ka sngi ïa ka Squat, Bench Press bad ka Deadlift. Ha kane ka lympung ki nongshim bynta ki dei ban pyndonkam ïa ki jaiñ uniform,” u la bynrap.
Te kumta kane ka synjuk ka la khot bad wer ïa ki khynnah ki samla kynthei bad shynrang jong ka Jylla ba ki wan shim bynta ha katei ka jingïakob ka ban long ha Umsning bad ka tarik kaba khatduh ban pdiang ïa ki nongshim bynta kan long ha ka 24 tarik u Lber.
Kiwei pat ki lympung ïalehkai kiba katei ka synjuk kan pynlong mynta u snem ki long ka 1st Squat (Open) na ka bynta ki kynthei bad shyrnang ka ban long ha u Jylliew, kumjuh ka 1st Deadlift ha u Nailar bad ka 5th Bench Press ka ban long ha Risaw mynta u snem. Kane ka synjuk kan pynkhreh ruh ban leit shim bynta ha ka Bench Press ka ban long ha Haryana ha u Kyllalyngkot jong u snem 2026.
