Jowai, Ïaïong 21
Ka lympung ïalehkai District Cricket League ba la pynïaid da ka West Jaiñtia Hills District Cricket Association (WJHDCA) ka la nangjam shaphrang ha ka Lah Sngi U Blei ha kaba ka Phramer CC ka la ïoh jingjop hadien ba ka la lah ban pynliem noh ïa ka Moodymmai SC da 6 run.
Ha kane ka jingïakhun, ka Moodymmai SC kaba la jop ïa ka kynting pisa, ka la ailad ïa ka Phramer CC ba kan tied nyngkong ha kaba ka la ïoh 189 run na ki 35 overs bad shah pynhap 9 wiket. U Ridame Sari u la tied 61 run na ki 67 bol, kynthup ïa ar tylli ki ‘six’ lem bad u George Ryngkhlem uba la tied 33 run na ki 55 bol, kynthup ïa kawei ka ‘six’. Katba u nongkawang bol ka Moodymmai u Bichar Lamare u la shim 5 wiket na ki 7 over.
Haba wan beh ïa ka thong, ki nongtied ka Moodymmai SC ki la shah pynhap 10 wiket bad ban tied tang 183 run ha ki 28.4 over. U Riboklang Hynñiewta u la tied 69 run na ki 51 bol ryngkat 4 tylli ki ‘six’ bad 9 tylli ki ‘four’. Katba u Kamni Suna jong ka Phramer u la khur 4 wiket bad u la ïohpdiang ruh ïa ka nam Man of the Match.
Ka jingïalehkai ha ka sngi Ba-ar kan long hapdeng ka West Jaiñtia Police CC pyrshah ïa ka Evergreen SC & CC naduh ka por 9 baje mynstep.
