Shillong, Rymphang 13
U Bah Sniawbhalang Dhar uba dei u National General Secretary ka National People’s Party (NPP) bad ruh u Symbud Myntri Rangbah ha ka Sngi Palei u la kyrpad ïa ki paidbah ka Rilum Jaiñtia ban kyrshan ïa ka NPP ha kane ka ilekshon JHADC ban wan namar ka seng ka dei kaba “Trei kham bun bad kren duna”.
Haba kren ha ka rynsan ïalap ilekshon ha shnong Iongkaluh ban pan jingkyrshan ïa u Bah Phasmos Dkhar, u MDC ba la ar samoi ka NPP na Musniang-Rangad, u Bah Dhar u la ong, “Ha ka por ilekshon, kiwei ki seng saiñ pyrthei kin wan bad kular shibun kiei kiei hynrei phi dei ban kynmaw ba ka NPP ka dei ka seng kaba kren tang 2% bad trei pat haduh 98%”.
“Ki don kito kiba kynnoh ba ka NPP kala leh ïa ki kam synshar donbor bad leh shiliang hynrei lada ngi leh shisha ïa kata, balei pat ba ngi theh da ki klur tyngka sha ki kam pynroi ha ka konstitwensi kum ka Khliehriat, kaba don u MLA uba dei na ka United Democratic Party (UDP). Ngi la bei da ki klur tyngka ki kam pynroi na ka bynta ka jingmyntoi bad ka bha ka miat u paidbah. Kumta, nga kyrpad ïa ki paidbah ba kin rai da ka jingstad ha shuwa ba kin thep vote. Kane ka long namar kawei ka vote ka im haduh 1825 sngi kaba mut 5 snem,” u la ong.
Haba kyntu ruh ïa ki paidbah ka Iongkaluh ban ai ka jingshaniah ha ka NPP da kaba jied biang ïa u Bah Phasmos sa shisien, u Symbud Myntri Rangbah u la ong “Nga kyrpad ïa ki paidbah ba kin vote ïa u Bah Phasmos lada phi kwah ïa ka Sorkar ba don ar engine. Ym tang katta, jied ïa u namar u dei u nongïalam uba la shemphang bad u la dei ruh u Executive Member (EM), uba la trei shitom bad noh synñiang shikatdei eh ïa ka konstitwensi bad ka thaiñ”.
Nalor kane, u Bah Sniawbhalang u la ong ba kam donkam satia ban sheptieng ïa ka Voice of the People Party (VPP) namar tang kito ki bym kwah ïa ka roi ka par ba shisha kin vote ïa ki.
“Nga shim ruh ïa kane ka kabu ban kyrpad ïa baroh ki paidbah ba kin ym pynsepei kai ïa ki vote jong ki “na ki jingrwai ilekshon ba bang” hynrei ban thep ïa ki vote na ka bynta ka roi ka par,” u la ong haba kam ba ka NPP ka la lah ban wanrah ïa ka roi ka par da ki klur bad phew klur tyngka tang ha kine ki 7 snem ba la ïalam ïa ka Sorkar hapoh ka Jylla.
“Ki briew ki kynnoh laiphew jait ïa ngi namar ngi dei ka Sorkar kaba treikam. Ka Sorkar ka bym shah kynnoh ka dei ka Sorkar ka bym treikam eiei ruh em. Kumta, nga kyrpad ïa phi ban jied ïa ka NPP ban ïoh ïa ka Sorkar kaba skhem,” u la ong.
U Bah Sniawbha u la ïathuh lypa ruh ba ka VPP kan ym tam ïa ka jingïoh MDC ba palat 6 ngut ha kane ka ilekshon ADC bad ong “Ha kane ka kynti, ngam tharai ba kin jop palat ïa ka 6 seat namar ki paidbah kila sngewthuh ba ka sepei ban jop lada kam don ka roi ka par”.
Haba kren ha ka jingïalang, u Bah Phasmos Dkhar u la kular ban bteng ha ka ban wanrah ïa ka roi ka par hapoh ka konstitwensi lada u shah jied biang kum u MDC. “Ki dang don shibun ki kam kiba nga hap ban leh eiei lada nga shah jied bad kane ka urlong tang lada phi ai ka jingshaniah ha nga kum u MDC jong phi”.
