Nongstoiñ, Rymphang 13
Saw ngut ki briew ki la duh ei noh la ka jingm hadien ba ki la kynduh ïa ka jingjia tyngkhuh kali ha kawei na ki jaka ha 5 Kilo jong ka surok Shallang ha West Khasi Hills.
U Superintendent of Police (SP) ka West Khasi Hills u la ïathuh ba katei ka jingjia ka la jia ha ka miet jong ka 11 tarik mynta u bnai ha ka por kumba 10.45 eiei.
Shuh shuh, u SP u la ong ruh ba na ka liang jong ki pulit ki la ïoh jingtip ba kawei ka trok kaba thylli ka bym pat don ïa u registration number (A/F) ba la ñiah da u briew bym shym la tip kyrteng katba ka dang thmu ban leit sha Shallang. Ynda haba ka la poi ha ki bynta jong ka 5 Kilo jong ka thaiñ Shallang ryngkat ka pynher sted bad ñiah khlem da pyrkhat jong u nongñiah ka la ïakynduh ïa ka jingjia aksiden bad kawei pat ka trok saw shaka kaba thylli kaba don ïa u registration number ML08-B-2494 bad hap sharud surok.
Ka khubor na u SP ka West Khasi Hills ka ong ruh ba ïa uwei napdeng saw ngut kiba la ngat ha katei ka apot, la tip kyrteng kum u Rahul Puwein (22 snem) na Nongriangka, Shallang bad ïa kiwei lai ngut kiba la khlad ha katei ka jingjia ym pat shym la lah ban ithuh ne tip kyrteng.
Ka khubor ka ong ruh ba hadien katei ka jingjia, la pynkit noh ïa baroh saw ngut sha Riangdo CHC ban pyndep ïa ka post mortem, bad ïa uwei na kitei saw ngut ba la ithuh kyrteng la aiti noh sha ki bahaïing ha ka 12.2.25 katba ïa lai ngut kiwei pat dang buh ha ka jaka buh metïap.
Ha kaba ïadei bad kane ka jingjia, la pynrung mukotduma ha thanat Shallang bad ka jingtohkit ka dang ïaid shakhmat.
