Shillong, Rymphang 13
Ka Chairperson jong ka Meghalaya State Commission for Women (MSCW), Kong Ïamonlang Syiem ka la pyntip ba ka longkmie kaba la shah thang im ha la u kurim ka la don mynta hapdeng ka met-ka phad kaba kham biang ban ïa kaba ïanujor ha ki bnai ba la dep bad ong ba kane ka longkmie ka la kham lah ban ïaid-ban ïeng.
Kum ban shu pyn-kynmaw, katei ka longkmie kaba la shah thang im ha la u kurim ka dei ba la tip kyrteng kum ka Kong Wompher Suting na ka shnong Niriang kaba hap hapoh ka Thadlaskeiñ Block ha West Jaiñtia Hills District ha ka 26 tarik u Nailur 2024. Katei ka longkmie ka la shah sumar hapoh Civil Hospital Shillong bad ïa u kurim jong ka uba la donkti ha kane ka kam bymman dei ba la tip kyrteng kum u Dahun Dkhar, uba la theh ïa ka da ka umphniang sharak ryngkat ka shoh-ka dat haduh ba kam tip briew shuh bad nangta u la thang im ïa ka ha ka ïingsah jong ki bad byrngem-byrsit ruh ba kam bit satia ban ïathuh ïano-ïano halor kane ka jingjia.
Ha ka jingïoh ïakren bad U Nongsaiñ Hima ha ka 11 tarik u Rymphang, 2025, ka Kong Ïamonlang ka la ong ba ïa katei ka longkmie hadien ba ka la shah sumar hapoh ka Shillong Civil Hospital, la pynkit noh ïa ka sha NEIGRIHMS namar ka jingmynsaw kaba jur bad ka jingbym don jong kane ka jaka sumar ïa ki tiar-ki tar kiba bit-biang ban ai jingsumar ïa katei ka longkmie.
Ka Kong Ïamonlang ka la ong ba hadien katto-katne sngi ba katei ka longkmie ka la shah sumar ha NEIGRIHMS, na ka liang katei ka longkmie kaba la ngat ha kane ka apot, ka la pynpaw ba ka kwah ban mih noh na katei ka jaka ai jingsumar bad kumta, ka la mih noh da ka mon laitluid jong ka na katei ka jaka ai jingsumar hynrei na ka liang ka Commission lyngba ka One Stop Centre kaba dei ka Centre kaba khmih bad peit ïa ka jingshah lehbeiñ bad ban beiñ jong ki ‘riew kynthei ha ki jaka bapher-bapher, na ka por sha ka por ka la leit ban peit ïa ka jinglong-jingman jong katei ka longkmie hynrei kham hadien katto-katne sngi eiei, la wan ban pynkit biang ïa katei ka longkmie sha NEIGRIHMS Hospital ban bteng biang ïa ka jingai jingsumar.
Ka la ong ba na ka liang ka Commission ka la ai jingïarap katba ka lah sha katei ka longkmie ha ka ban peit ban khmih ïa ka bai dawai-dashin bad ka bai sumar hynrei na ka liang ka Commission kam lah kotbor shuh ban ïai bteng ha ka ban siew ïa ka bai dawai-dashin kaba la pynlong ïa ki bahaïing-bahasem jong katei ka longkmie ba kin kwah ban mih biang noh na katei ka jaka ai jingsumar.
Shuh-shuh, ka Kong Ïamonlang ka la ong ba na ka liang ka Committee on Empowerment of Women ba la khlieh da ka Kong Santa Mary Shylla ka la kular ban ai jingïarap sha kane ka longkmie lyngba ki skhim bad ki lad jingïarap kiba wan na ka Sorkar Pdeng bad ka Sorkar Jylla.
