Kolkata, Rymphang:
Ka sorkar West Bengal ha ka sngi Balang ka la pynbna ban pynkiew 4% ïa ka Dearness Allowance (DA) na ka bynta ki nongtrei jong ka naduh ka 1 tarik, Ïaïong ha ka mang tyngka ba la wanrah da u Chandrima Bhattacharya, Myntri ka tnat pla tyngka ka jylla.
Ka mang tyngka jong ka jylla na ka bynta u snem 2025-26, kaba la buh T.3.89 lak klur, ka buh jingmut bha ha ka imlang-sahlang, ka jingroi jong ki nongkyndong bad ki jingtei. Ka sorkar ka la mang pisa na ka bynta ban pynïasoh ïa ki nongkyndong, ban tehlakam ïa ka jingtwa jong ki rud wah, bad ban kyrshan ïa ka rep ka riang.
Ki seng ka liang pyrshah ki la kynnoh ba la pynkiew dor ïa ka DA da kaba peitngor ïa ka ilekshon sha ka Ïingdorbar Thawaiñ kaba dei ban long ha u snem 2026. U Bhattacharya u la ong, “Da kane ka jingkiew dor 4 percent ha ka DA, ngi pynskhem biang ïa ka jingkular jong ngi na ka bynta ka bha ka miat jong ki nongtrei jong ngi.”
Ka jingkiew dor kan pynpoi ïa ka DA baroh sha ka 18 percent na ka bynta ki nongtrei, kaba ai jingsuk ïa ki hapdeng ka jingkiew dor jong ki marbam. Ka DA baroh na ka bynta ki nongtrei bad kiba ïoh penshon ha ka jylla mynta kan ïeng haduh 42 percent na ka Basic Pay lane ka penshon jong ki.
U Bhattacharya u la ïathuh ba ka West Bengal ka Gross State Domestic Product ka la kiew da 6.8 percent ha u snem 2024-25 pyrshah ïa ka jingkiew jong ka ri baroh kawei kaba long 6.37 percent. Ka la pynksan ba ka ïoh ka kot jong ka jylla ka la pyni ia ka “jinglah ban ïakhun” ha baroh lai tylli ki bynta-ka rep ka riang, ka karkhana, bad ki jingshakri-ka la palat ïa ki jingkheiñ jong ka ri.
