Shillong, Rymphang 14
Ha ka sngi pynkut ïa ka 38th National Games kaba la long ha Uttarakhand, u Myntri Rangbah ka Meghalaya, Conrad K Sangma u la leit ban pdiang ïa ka lama jong ka Indian Olympic Association (IOA) ka ban long kum ka dak ban aiti pura sha ka Meghalaya ban pdiang bad pynlong ïa ka 39th National Games.
Ïa ka lama jong ka IOA la aiti sha u Myntri Rangbah ka Jylla, Conrad K Sangma da u Myntri ka tnat Kam Pohïing ka Sorkar Pdeng u Amit Shah bad ka Chairperson jong ka IOA ka PT Usha, ha ka jingïadon lang u Myntri ka tnat Ïalehkai, Dr. Mansukh Mandaviya, bad u Myntri Rangbah ka Jylla Uttarakhand, Pushkar Singh Dhami.
Haba ai jingkren ha katei ka jingïalang, u Myntri Rangbah ka jylla u la ong, “Ka jingpdiang ïa ka National Games kaba 39 kan long ka khyllipmat kaba sngew sarong ïa ka jylla Meghalaya bad ka jingpynpaw haduh katno ngi la poi ha ka ban pynkhlaiñ ïa ka sports ha ka jylla, na kawei ka jaka ïalehkai kaba heh ha u snem 2018 haduh palat 200 tylli ki projek pynroi mynta”.
“Ngi la bei T. 1,200 klur ban tei ïa ki jaka ïalehkai, ngi la pyntbit ïa palat 24,500 ngut ki khynnah samla ha ki jingïalehkai, bad ngi la buh ïa ka thong ban pynmih ïa ki nongïalehkai Olympic ha u snem 2032” u la ong. Katba ka jingpynkhreh ïa ka National Games, ka jingpynleit jingmut jong ngi ka dang sah ha kaba thaw ïa ka pateng kaba neh ka ban ai mynsiem ïa ki pateng jong ki nongïalehkai bad kyntiew ïa ka jingdon jong ka Meghalaya ha ki rynsan ïalehkai jong ka Ri (National sports stage).
U la ong ruh ba ka jingaiti jong ka Jylla ban kyntiew ïa ka kam ïalehkai ka la paw ha ka jingjop ba dang shen ha ka 38th National Games, ha kaba ki nongïalehkai ka Meghalaya ki la ïoh khur 5 tylli ki takma; kane ka pynshisha ïa ka jingroi bad jingtbit jong ka jylla ha ka kam ïalehkai.
Ïa u Myntri Rangbah ka Jylla la synran lang da u Dr. Vijay Kumar D, IAS, Commissioner & Secretary, Department of Sports and Youth Affairs, u Bah John F Kharshiing – President jong ka Meghalaya State Olympic Association (MSOA), ryngkat ki nongïalehkai kumjuh ki coach na kylleng ka jylla. Ka jingwan ïashim bynta jong ki dkhot ka la pynpaw ïa ka jinglong kawei bad ka jingïatylli jong ka Meghalaya ban pynlong ïa kane ka lympung kaba heh tam hapoh ka ri.
Ka National Games kaba 39 ka ban long ha ka jylla ha u snem 2027 kan dei ruh ka snem ba ka jylla kan kynjoh 55 snem ha ka jingïaid lynti jong ka.
